Hálka og slæmt skyggni víða

Ökumenn ættu að fara að öllu með gát í dag en víða á landinu er mikil hálka sem gæti reynst varasöm. Þannig eru hálkublettir og éljagangur á Reykjanesbraut og reyndar víðast hvar á Reykjanesinu. Snjóþekja og éljagangur er á höfuðborgarsvæðinu, á Sandskeiði, Hellisheiði og í Þrengslum.

Snjóþekja og éljagangur er á flestum leiðum á Suðurlandi og þó er eitthvað um þæfingsfærð. Þá kemur fram á vefsíðu Vegagerðarinnar að snjóþekja, hálka og éljagangur er á Vesturlandi. Hálka er á Bröttubrekku og á Holtavörðuheiði og þá er ófært á Fróðárheiði.

Á Vestfjörðum er hálka eða snjóþekja á flestum leiðum. Þæfingsfærð er norður í Árnessýslu. Hálka eða hálkublettir eru á flestum leiðum á Norðurlandi og einhvar um skafrenningur norðausturhorninu. Snjóþekja og éljagangur er á Öxnadalsheiði. Snjóþekja og skafrenningur er á Hálsum.

Á Austurlandi er hálka eða snjóþekja. Þæfingsfærð er á Vatnskarði eystra. Snjóþekja eða hálka er frá Breiðdalsvík og með Suðausturströndinni. Vegfarendur eru beðnir um að sýna aðgát á Meleyri við Breiðdalsvík vegna vatnaskemmda. Vegna frágangsvinnu við hringtorgið við Fitjar á Reykjanesbraut er umferðarhraði takmarkaður við 50 kílómetra hraða á klukkustund á vinnusvæðinu.

Upplýsingarnar um færð og veður breytast oft á dag og því biðlar Vegagerðin til allra að bera þær hana saman við upplýsingarnar á heimasíðu Vegagerðarinnar.