Harma frestun hjartaaðgerðar

„Okkur þykir mjög leitt að fresta þurfi aðgerðum en slíkt getur verið afar erfitt fyrir sjúklinga og aðstandendur þeirra. Á hverjum degi þurfum vð að forgangsraða verkefnum á spítalanum þar sem við horfum fyrst og síðast til öryggis sjúklinga,“ segir Ólafur Baldursson, framkvæmdastjóri lækninga á Landspítalanum.

Vísir greindi frá því í morgun að Bjarki Már Ólafsson hefði haldið heim af spítalanum í morgun án þess að hafa gengist undir aðgerð sem hann hefur beðið í á þriðja ár eftir að komast í. Þakkaði hann heilbrigðisstarfsfólki fyrir þeirra viðmót en sagði augljóst að endurreisa þyrfti heilbrigðiskerfið hér á landi.

Ólafur segir að því miður komi stundum til þess að fresta þurfi skipulögðum aðgerðum vegna plássleysis á bráðalegudeildum eða gjörgæslum. Þetta gerist þar sem nýting bráðalegurýma á Landspítalanum er að jafnaði um 100% eða meira sem er langt umfram það sem eðlilegt telst á bráðasjúkrahúsum.

Eins og fram hefur komið í fréttum var mikið um alvarleg slys um liðna helgi og mikið annríki á gjörgæslum og bráðalegudeildum. Sjúklingar liggja að jafnaði inni á gjörgæslu í einn til tvo daga eftir stórar aðgerðir.