Neikvæð umfjöllun í upphafi en svo hlutlaus eða jákvæður tónn

Að mati utanríkisráðuneytisins gætti neikvæðs tóns í upphafi fjölmiðlaumfjöllunar erlendis þegar fjallað var um tengsl Sigmundar Davíðs Gunnlaugssonar, fyrrverandi forsætisráðherra og formanns Framsóknarflokks, við aflandsfélagið Wintris en málið vakti heimsathygli í liðinni viku í kjölfar viðtals sem tekið var Sigmund Davíð og birt á sunnudagskvöldið.

Eins og flestum er kunnugt um var Sigmundur Davíð þar spurður út í tengsl sín við Wintris en hann brást illa við spurningunum og endaði það með því að ráðherrann gekk út úr viðtalinu.

Fjallað var um Sigmund Davíð og ástandið á Íslandi vegna Wintris-málsins í fjölmiðlum um allan heim  Lilja Alfreðsdóttir, utanríkisráðherra, kynnti á ríkisstjórnarfundi í morgun samantekt ráðuneytisins um fjölmiðlaumfjöllunina og áhrif hennar á orðspor og ímynd Íslands.

Sjá einnig: Málið er að valda Íslandi stórfelldu tjóni

Í skriflegu svari ráðuneytisins við fyrirspurn Vísis vegna samantektarinnar kemur fram að umfjöllun erlendra fjölmiðla um málið hafi verið staðreyndamiðuð og beitt. Neikvæðs tóns hafi gætt til að byrja með en varð jákvæðari eftir því sem á leið, ekki síst þegar fjallað var um mótmæli á Austurvelli og þegar ný ríkisstjórn tók við.

Mat ráðuneytisins er „að til skemmri tíma litið hafi ímynd og ásýnd Íslands á alþjóðavettvangi ekki beðið umtalsverðan hnekki þrátt fyrir talsverða ágjöf.“ Of snemmt sé hins vegar að segja til um áhrif til lengri tíma en í svari ráðuneytisins segir meðal annars:

„Umfjöllunin um Ísland hefur beinst að helstu gerendum í stjórnmálum landsins og mótmælum almennings en síður að viðskiptalífinu og þaðan af síður hefur umfjöllunin beinst að Íslandi almennt og þeim stóru verkefnum sem ríkisstjórnin hefur unnið að við losun fjármagnshafta.

Það er ljóst að umfjöllunin öll hefur verið í neikvæðu ljósi framan af,  þar sem Ísland var fyrsta vestræna lýðræðisríkið sem litað er af uppljóstrununum. Ítarleg umfjöllun um eignir og félög fyrrum forsætisráðherra og annarra ráðamanna í skattaskjólum og ekki síður myndræn framsetning í helstu miðlum er ekki jákvæð.

Umfjöllun um afsögn fyrrum forsætisráðherra og nýskipan ríkisstjórnarinnar hefur á hinn bóginn verið með hlutlausum hætti. Þá hefur mótmælum almennings verið gerð góð skil og þykja þau almennt til marks um virkt lýðræði.“

Þá skoðar utanríkisráðuneytið nú, ásamt öðrum ráðuneytum hvort ástæða sé til að bregðast við umfjölluninni, til dæmis með greinaskrifum, viðtölum eða öðru móti en þeirri vinnu er ekki lokið.