HIV samtök frá Rúmeníu kynna sér forvarnarstarf á Íslandi

Þrír fulltrúar HIV samtaka í Rúmeníu eru komnir hingað til lands til að kynna sér starfsemi HIV Ísland. Talsmaður samtakanna segir HIV jákvæða vera þann samfélagshóp sem mest er mismunað í Rúmeníu, þótt ástandið hafi skánað mikið frá því einræðisherrann  var hrakinn frá völdum.

Aðstæður HIV jákvæðra í Rúmeníu hafa sem betur fer batnað mikið frá þeirri hörmungarmynd sem blasti við eftir að almenningur steypti Ceausescu af stóli árið 1989, þegar þúsundir barna, mörg smituð af HIV,  fundust vannærð og yfirgefin á munaðarleysingjahælum víðs vegar um landið.

 

Alex Gheorghiu formaður Semper musica HIV samtakanna í Rúmeníu segir stöðu HIV jákvæðra engu að síður langt í frá góð í landinu. “HIV-jákvæðir í Rúmeníu sæta mestri mismunun allra hópa þar samkvæmt landsráðinu gegn mismunun. HIV-jákvæðir sæta mun meiri mismunun

en t.d. sígaunar og aðrir hópar. Engum öðrum hópi í Rúmeníu er mismunað eins og þessum,” segir Alex.

HIV jákvætt fólk fái þó matarpeninga og fría læknishjálp en sé umvörpum neitað um vinnu og rekið komist upp að það sé smitað. Mörg þeirra barna sem fundust á munaðarleysingjahælunum séu enn á lífi. Sum hafi spjarað sig en önnur lent á götunni eftir 18 ára aldurinn og jafnvel leiðst út í vændi.

 

Yfirgefnu börnin

 „Við höfum t.a.m. verið í sambandi við einn þessara einstaklinga og ræddum lengi við hana.

Hún smitaðist á barnsaldri þegar Ceausescu var við völd. Hún smitaðist á sjúkrahúsi.

Sem betur fer var stofnun við lýði í Rúmeníu mjög virk í þessum málum eftir fall Ceausescus og byltinguna, sem annaðist þessa einstaklinga og reyndi að laga þá að samfélaginu.

En þegar fjölskylda sem ætlaði að ættleiða hana komst að því að hún væri HIV-jákvæð

var ættleiðingunni rift,” segir Alex.

 

Þremenningarnir fengu styrk frá verkefni sem kallast "Allir fyrir einn" og er fjármagnað af stjórnvöldum á Íslandi, í Noregi og Liktenstein. Þeir hafi valið að kynna sér starfsemi íslensku samtakanna vegna þess að þau séu þau elstu starfandi í þessum þremur ríkjum og hafi náð góðum árangri.

 

„Það er mikilvægt fyrir okkur að heimsækja samtök sem hafa verið virk í svo langan tíma og sjá hvað þau hafa gert í sínu starfi. Við viljum flytja þessa þekkingu heim til okkar og nýta til forvarna í Rúmeníu. En við einbeitum okkur að því að uppfræða ungmenni,” segir Alex.

 

Þeir munu því meðal annars fara í heimsóknir í grunnskóla með fulltrúum HIV Íslands til að kynnast fræðslustarfinu hér á landi. En í Rúmeníu er þeim meinaður aðgangur að grunnskólunum vegna andstöðu Rétttrúnaðarkirkjunnar. Samtökin einbeita sér því að framhaldsskólunum í fræðslustarfi sínu á þeim svæðum sem áhrif kirkjunnar eru mest. En þar berst hún m.a. gegn notkun smokksins.

 

„Við förum aðallega til austurhluta Rúmeníu og til suðurhlutans þar sem mest er um nýgengi HIV-smits. Á þessum svæðum er fátækt líka mest í Rúmeníu og áhrif rétttrúnaðarkirkjunnar mjög mikil þannig að við leggjum áherslu á þessi svæði í fræðslustarfi okkar,“  segir Alex.