Uppfært: Bjarni gegnir ekki formennsku í félaginu

Bjarni Benediktsson fjármálaráðherra mun ekki sinna stjórnarformennsku í nýju einkahlutafélagi sem mun sjá um sölu þeirra eigna ríkisins, annarra en Íslandsbanka, sem til eru komnar af stöðugleikaframlögunum. Þetta kemur fram í tilkynningu frá Fjármálaráðuneytinu. 

Fréttastofa RÚV greindi frá því í gær að Bjarni myndi sinna stjórnarformennsku í félaginu. Stofnun slíks félags er heimil samkvæmt lagabreytingu sem samþykkt var á Alþingi í síðasta mánuði en þær breytingar gera ráð fyrir því að utanaðkomandi aðili haldi utan um félagið.

Til að mynda er þar talað um að félagið skuli gera samning við fjármálaráðherra um starfshætti þess og verkefni og að ráðherra skuli gera Alþingi grein fyrir störfum félagsins á grundvelli „áætlana og annarra upplýsinga frá félaginu.“

Fréttastofa 365 reyndi að fá formennsku Bjarna staðfesta af honum sjálfum og aðstoðarkonu hans í morgun en fátt var um svör. Tilkynning barst frá fjármálaráðuneytinu klukkan 11:54.

Þingkonurnar Birgitta Jónsdóttir og Katrín Jakobsdóttir gagnrýndu báðar þá staðreynd að Bjarni yrði formaður félagsins eins og fram kom í frétt RÚV. Það virðist samkvæmt upplýsingum úr ráðuneytinu ekki vera rétt.

Fréttin var uppfærð eftir að tilkynning barst frá fjármálaráðuneytinu vegna málsins og Svanhildur Hólm, aðstoðarkona Bjarna Benediktssonar, svaraði fyrirspurn fréttastofu.