Bjarni ekki stjórnarformaður

Samkvæmt upplýsingum frá fjármálaráðuneytinu er það ekki rétt sem fram kom í frétt RÚV í gærkvöldi að Bjarni Benediktsson fjármálaráðherra muni gegna stjórnarformennsku í nýju einkahlutafélagi um sölu ríkiseigna vegna stöðuleikaframlagsins.

Þetta fyrirkomulag hafði víða verið gagnrýnt í gærkvöldi og í morgun en Elva Björk Sverrisdóttir, upplýsingafulltrúi fjármálaráðuneytisins, segir að Bjarni muni ekki gegna stjórnarformennsku hjá félaginu. Hann muni hins vegar skipa stjórnina.

Ráðuneytið hefur sent frá sér tilkynningu vegna málsins. Fréttastofa reyndi að fá viðtal við Bjarna vegna málsins í morgun en hafði ekki erindi sem erfiði.

Uppfært 12.30:RÚV hefur birt leiðréttingu á vef sínum og beðist velvirðingar.