Landvernd sögð valda tjóni með kæru vegna 120 herbergja hálendishótels

„Sveitarstjórn lýsir yfir miklum vonbrigðum með framkomu Landverndar í þessu máli,“ segir sveitarstjórn Hrunamannahrepps um kæru Landverndar vegna hótels í Kerlingarfjöllum.

Um er að ræða hótel Fannborgar ehf. í Ásgarði í Kerlingarfjöllum. Í hótelinu, sem reisa á í þremur áföngum, verða 120 tveggja manna herbergi. Á móti á að grisja í skálaþyrpingu Fannborgar svo þar verði svefnpláss fyrir 102 gesti í stað 177. Á endanum verði hægt að hýsa 342 gesti.

Landvernd kærði í ágúst í fyrra til úrskurðarnefndar umhverfis- og auðlindamála þá ákvörðun Skipulagsstofnunar að heildaruppbygging hálendismiðstöðvarinnar í Kerlingarfjöllum skyldi háð mati á umhverfisáhrifum en að heimilt væri að reisa fyrsta áfangann án umhverfismats

„Það er mjög bjánalegt að sleppa þeim með fyrsta áfangann en að síðan eigi að umhverfismeta seinni tvo. Þá eru þeir komnir af stað með þessa byggingu og þá verður mjög erfitt að hætta við. Okkur finnst þetta vera það fordæmisgefandi mál að það þurfi að gera þetta almennilega frá A til Ö,“ segir Snorri Baldursson, formaður Landverndar.

Eftir að Landvernd varð þess áskynja nú í febrúar að framkvæmdir við hótelið væru hafnar og að Hrunamannahreppur hefði gefið út byggingarleyfi var gerð krafa um stöðvun framkvæmda og útgáfa byggingarleyfisins var kærð.

„Framkomin kæra Landverndar virðist vera til þess eins fallin að valda sveitarfélaginu og hagsmunaaðilum á svæðinu tjóni þótt mál séu þar unnin í samræmi við svæðisskipulag miðhálendisins, landsskipulagsstefnu, aðalskipulag Hrunamannahrepps, deiliskipulag svæðisins, lóðaleigusamninga, sem gilda varðandi starfsemi svæðisins, og úrskurð Skipulagsstofnunar varðandi matsskyldu framkvæmda,“ segir sveitarstjórn Hrunamannahrepps.

„Alls ekki,“ svarar Snorri aðspurður hvort ætlun Landverndar sé að bregða fæti fyrir ferðaþjónustu í Hrunamannahreppi og sveitarfélagið sjálft. „En við þurfum að nota þau úrræði sem við höfum.“