Skutu kjarnorkueldflaug á loft

Bandaríkin skutu á dögunum á loft kjarnorkueldflaug frá Kaliforníu. Flauginni, sem búið var að taka kjarnorkuvopnin úr, er af gerðinni Minuteman III og var henni skotið yfir Kyrrahafið. Með tilraunaskotinu voru Bandaríkin að senda skilaboð til andstæðinga sinna og þá sérstaklega til stjórnvalda í Norður-Kóreu.

Þetta var annað tilraunaskotið á einum mánuði, en undanfarin misseri hafa Norður-Kóreumenn verið nokkuð málglaðir varðandi kjarnorkutilraunir sínar.

Minuteman flaugarnar voru fyrst teknar í notkun árið 1970, en þær áttu upprunalega að vera notaðar í einungis tíu ár. Samkvæmt AP fréttaveitunni eru margir íhlutir flauganna ekki lengur í framleiðslu. Allt í allt á flugher Bandaríkjanna 450 flaugar sem staðsettar eru í Wyoming, Montana og Norður-Dakota.

Nokkrum sinnum á ári, er ein þeirra flutt til Vandenberg í Kaliforníu og skotið á loft.

Hálftíma eftir að flauginni var skotið á loft kom farið, sem í stríði bæri kjarnorkuvopn, aftur til jarðar við Kwajalein eyjar í Kyrrahafi.

Aðstoðarvarnamálaráðherra Bandaríkjanna, Robert Work, sagði fréttamönnum Reuters að tilraunirnar væru mikilvægar. Hann sagði Rússa og Kínverja reglulega framkvæma sambærilegar tilraunir. Þær væru skilaboð til umheimsins að kjarnorkuvopn ríkjanna væru ávalt tilbúin til notkunar til að verja þau.

Undanfarin ár hafa hins vegar komið upp nokkur vandræðaleg mál varðandi kjarnorkuvopn Bandaríkjanna. Fyrir tveimur árum fór John Oliver yfir helstu málin og sjá má umfjöllun hans hér að neðan.