Veiddu fjóra hákarla á fjórum dögum

Áhöfnin á Jóni Ásbjörnssyni hefur fengið fjóra hákarla á línu hjá sér á síðastliðnum fjórum dögum. Hákarlarnir komu á línu um tuttugu sjómílur frá Þorlákshöfn en þrír þeirra eru bláháfar sem er ein hættulegasta tegund hákarla í heimi.

Áhöfninni brá heldur betur í brún þegar Bláháfur beit á hjá þeim fyrir fjórum dögum. Næstu þrjá daga fékk báturinn þrjá hákarla til viðbótar, einn á dag.

„Aldrei lent í svona áður. Við erum með mjög reyndan skipstjóra en hann man ekki eftir því að hafa lent í svona. Þetta hlýtur að vera hlýnandi sjór,“ segir Gísli Ármannsson, háseti og Jóni Ásbjörnssyni.

Hákarlanir komu á línu um tuttugu sjómílur frá Þorlákshöfn. Fyrstu þrír voru bláháfar og er sá fjórði talinn vera brandháfur.

„Brandháfurinn er ekki hættulegur en hinir eru víst með þeim tíu hættulegustu í heimi,“ segir Gísli.

Á Vísindavefnum segir að bláháfurinn geti orðið allt að 3,8 metrar að lengd og rúm 200 kíló að þyngd. Hans helsta fæða sé smokkfiskur og kolkrabbi auk þess sem hann geri tækifærisárásir á dýr sem hann kemst í tæri við, og eru menn þar ekki undanskildir. Bláháfurinn er meðal hraðskreiðustu fiska og hafa vísindamenn mælt hann á 35 kílómetra hraða á klukkustund.

Einum hákarlinum var sleppt aftur í sjóinn, annar verður hafður almenningi til sýnis, sá þriðji endaði á fiskmarkaði og sá fjórði er enn á lífi og er geymdur í kari í Þorlákshöfn.

„Það er smá líf í honum og við ætluðum að athuga hvort hann myndi ekki braggast aðeins og þá ætluðum við að sleppa honum í sjóinn.“

Þá fékk áhöfnin á línubátnum Sæunni Sæmundsdóttur bláháf á línu hjá sér í tvígang í lok ágúst. Hákarlarnir komu á línuna um fimmtán sjómílur frá Þorlákshöfn.

En hafa atburðir síðustu daga áhrif á brimbretta- og sjósunds-kappa?

„Nú veit ég ekki en ég myndi nú ekki vera pollrólegur að vera í sjósundi eða að surfa hérna í kring um Þorlákshöfn,“ segir Gísli og hlær.