Margdæmdur ofbeldismaður ákærður: Stappaði á höfði sofandi manns

Styrmir H. Snæfeld Kristinsson hefur verið ákærður af héraðssaksóknara fyrir sérstaklega hættulega líkamsárás í fjölbýlishúsi við Bríetartún í október 2014. Honum er gefið að sök að hafa ítrekað slegið með krepptum hnefa og sparkað í og stappað á höfði annars manns sem lá sofandi á dýnu, með þeim afleiðingum að hann missti meðvitund.

Þá hlaut maðurinn margúl og hruflsár vinstra megin á enni, glóðurauga undir vinstra auga og sár á neðri vör og dreifð þreifieymsli yfir öllum andlitsbeinum og yfir mjúkpörtum beggja vegna aftan á hálsi. Aðalmeðferð í málinu fer fram í lok maí.

Styrmi er einnig gefið að sök að hafa í nóvember sama ár í íbúð í öðru fjölbýlishúsi, ítrekað slegið með krepptum hnefa í höfuð konu og síðar sömu nótt, eftir að lögreglu bar að garði, slegið hana með krepptum hnefa í andlitið allt með þeim afleiðingum að hún hlaut nefbrot, heilahristing og dreifð þreifieymsl, yfir gagnaugasvæði vinstra megin, yfir bein í kringum vinstra auga, yfir nefi, yfir hryggjatindum, beggja vegna á hálsi og yfir barka og tungubeini.

Styrmir afplánar nú fjögurra ára dóm sem hann hlaut í júní í fyrra fyrir líkamsárás úti á Granda í ársbyrjun 2015. Stakk hann manninn með hníf í brjóstkassann.

Sakaferill Styrmis er langur. Hann hefur alls tólf sinnum verið dæmdur fyrir brot gegn almennum hegninarlögum og umferðarlögum. Fimm sinnum hefur hann gengist undir sátt vegna brota gegn sömu lögum. Hann hefur fimm sinnum verið dæmdur í fangelsi fyrir líkamsárás, fyrst árið 1994.