Fjögurra ára fangelsi fyrir hnífsstunguárás

Héraðsdómur Reykjavíkur dæmdi í dag tæplega fertugan karlmann, Styrmi Haukdal Snæfeld Kristinsson, í fjögurra ára fangelsi fyrir líkamsárás. Dómurinn taldi sannað að Styrmir hefði stungið mann í brjóstið við fyrir utan smáhýsi við Fiskislóð í Reykjavík með þeim afleiðingum að fjögurra sentimetra skurðsár myndaðist á brjósti hægra megin.

Lögregla var kölluð á vettvang þann 10. janúar síðastliðinn eftir að hafa fengið tilkynningu um að maður hefði verið stunginn með hníf í brjóstkassann skammt frá fiskislóð. Á upptökum úr öryggismyndavél sést hvar Styrmir og brotaþoli takast á og brúka meðal annars nálægar tunnur, skóflur og grindur til verksins. Báðir aðilar voru undir áhrifum eiturlyfja þegar atvikið átti sér stað.

Í yfirheyrslum játaði Styrmir að hafa stungið brotaþola með hníf en hafi ekki ætlað að bana honum. Engin vitni voru að atburðinum önnur en mennirnir tveir sem áttust við og hefur hnífurinn ekki fundist.

Sakaferill Styrmis er langur. Hann hefur alls ellefu sinnum verið dæmdur fyrir brot gegn almennum hegninarlögum og umferðarlögum. Fimm sinnum hefur hann gengist undir sátt vegna brota gegn sömu lögum. Hann hefur fimm sinnum verið dæmdur í fangelsi fyrir líkamsárás, fyrst árið 1994, og setið vel á fjórða ár innan veggja fangelsa landsins.

Í dómsorði segir að árásin hafi verið alvarleg og að brotaþoli hafi varist henni allan tímann. Þykir fjögurra ára fangelsi hæfileg refsing en til frádráttar því komi gæsluvarðhald frá 13. janúar til 26. mars. Að auki var Styrmi gert að greiða brotaþola eina milljón króna í skaðabætur og allan málskostnað.

Dóminn í heild sinni má lesa hér.

Uppfært 22.55: Í upprunalegri útgáfu fréttarinnar stóð að Styrmir hefði verið sakfelldur fyrir tilraun til manndráps, en hið rétta er að hann hlaut dóm fyrir líkamsárás. Beðist er velvirðingar á þessum mistökum.