Ákæru vísað frá dómi vegna lögreglumanns sem var augljóslega vanhæfur

Hæstiréttur Íslands hefur staðfest frávísun Héraðsdóms Austurlands á ákæru gegn manni sem var sakaður um brot gegn valdstjórninni. Var maðurinn grunaður um að hafa hótað tveimur lögreglumönnum og eiginkonu annars þeirra líkamsmeiðingu.

Í úrskurði Héraðsdóms Austurlands var rakið að annar lögreglumannanna hefði verið viðstaddur skýrslutöku af sambýliskonu mannsins sem var ákærður, en til þess var hann augljóslega vanhæfur að mati dómsins. Þá tók lögreglumaðurinn beinlínis þátt í skýrslutökunni með því að beina tvívegis spurningum til vitnisins. Taldi dómurinn að um svo alvarlegan annmarka á rannsókn málsins væri að ræða að óhjákvæmilegt væri að vísa málinu frá dómi.

Lögreglan sinnti útkalli vegna heimiliserja

Maðurinn var ákærður fyrir brot gegn valdstjórninni með því að hafa aðfaranótt miðvikudagsins 31. Desember árið 2014 ítrekað hótað lögreglumönnunum sem voru við skyldustörf á heimili hans, líkamsmeiðingum auk þess sem maðurinn var sakaður um að hafa hótað eiginkonu annars lögreglumannanna líkamsmeiðingum.

Samkvæmt frumskýrslu lögreglustjórans á Austurlandi tilkynning um heimiliserjur laust fyrir miðnætti 30. desember 2014 í gegnum fjarskiptamiðstöð lögreglustjóra. Kom fram að tilkynningin hefði borist frá sambýliskonu mannsins og var upplýst að börn væru á staðnum. 

Tveir lögreglumenn lögðu af stað frá Egilsstöðum og voru komnir á vettvangi skömmu eftir að tilkynningin barst.

Kom til átaka

Lögreglumennirnir eru sagðir hafa rætt í sitthvoru lagi við manninn og sambýliskonu hans en maðurinn hafi orðið sífellt æstari. Hafi þá hótanirnar sem hann var sakaður um átt sér stað. Samkvæmt greinargerðinni kom í kjölfarið til átaka milli sambýlisfólksins og lögreglumennirnir gengið þar á milli, og átti maðurinn að hafa brugðist illa við því. Var maðurinn handtekinn og vistaður í fangaklefa.

Í skýrslunni kom fram að lögregla hafði samband við barnaverndaryfirvöld, auk þess sem rætt var símleiðis við sambýliskonu mannsins en hún hafi þá dregið allt til baka sem hún hafði áður sagt um hegðun mannsins og óskað eftir að hann kæmi aftur heim sem fyrst. Var manninum sleppt á þriðja tímanum sömu nótt.

Maðurinn byggði frávísunarkröfu sína á því að embætti lögreglustjórans á Austurlandi hafi verið vanhæft til að annast rannsókn málsins, auk þess að rannsókn málsins hafi verið haldin svo veigamiklum annmörkum að ekki væri annað hægt að en vísa málinu frá dómi.

Féllust bæði Héraðsdómur Austurlands og Hæstiréttur á það sjónarmið og vísuðu ákærunni frá dómi. 

Lesa má dóminn hér.