Algert hrun í tekjum smábátaútgerða

Rússar skulda íslenskum útgerðum á bilinu tvo til þrjá milljarða króna og flutningaskipi með loðnu og makríl var snúið frá Rússlandi í dag. Algert hrun verður í tekjum smábátaútgerða af makrílveiðum í ár vegna innflutingsbanns Rússa.

Fulltrúar útgerðar, fiskvinnslu, smábátasjómanna og laxeldisstöðva funduðu með embættismönnum úr forsætisráðuneytinu, utanríkisráðuneytinu og atvinnuvegaráðuneytinu í stjórnarráðinu í dag vegna innflutningsbanns Rússa á íslenskum fiski.

Kolbeinn Árnason, framkvæmdastjóri Samtaka fyrirtækja í sjávarútvegi (SFS), segir megintilgang fundarins  að reyna að greina ástandið.

„Við erum að reyna að átta okkur á umfangi þess hvað varðar fjármagn, störf og almenn áhrif hér á landi. Við erum að reyna að átta okkur á leiðum til að minnka þetta áfall og reyna þá að vera skapandi í því að skilgreina nýja staði til að selja og veita meira svigrúm fyrir fyrirtækin til að bregðast við þessu,“ segir Kolbeinn.

Allir verði að vinna saman að því að takmarka tjónið. Ekkert komi í stað Rússlandsmarkaðar eins og skot og vonandi opnist sá markaður aftur.

Smábátaútgerðin kemur illa út úr makrílvertíðinni á þessu sumri vegna innflutningsbannsins. Örn Pálsson formaður Félags smábátasjómanna segir báta nú hætta veiðum hver af öðrum og tekjutapið sé mikið.

„Við ætluðum okkur að veiða sjö til átta þúsund tonn en við erum í nokkur hundruð tonnum það sem af er. Veiðin er samt mjög góð og makríllinn í góðu standi. Þannig að þetta er alveg sorg grætilegt,“ segir Örn.

Þannig að það er nánast að verða sjálfstopp?

„Já það horfir því miður til þess og fáir sem hafa líka áhuga á að taka á móti makrílnum og fyrirtæki hafa líka verið að stoppa,“ segir Örn.

Rússar í mikilli kreppu

Um sjötíu prósent af útflutningstekjum Rússa koma frá gasi og olíu en verð á henni hefur hríðfallið á heimsmarkaði á undanförnum misserum eins og rússneska rúblan. Margt bendir því til að innflutningsbannið sé að hluta til yfirvarp til að fela skort á gjaldeyri.

„Mér finnst þetta ekki líklegt. Af hverju að takmarka innflutning á matvælum sem eru tiltölulega ódýr og fara til þeirra sem ekki hafa mikið umleikis á meðan enn er heimilt að flytja inn Benza og Gucci töskur? Það er notaður gjaldeyrir til að kaupa það líka. Ég held að það sé ekki líkleg skýring,“ segir Kolbeinn.

En elítan kaupur Gucci og Benz en almenningur fiskinn og kannski eru matvæli flutt inn fyrir stærri upphæðir en þessar lúxusvörur sem þú nefnir?

„Ég tek þetta bar sem dæmi. En að fókusinn komi yfir á Ísland vegna stórrar gjaldeyriskreppu, ég sé það ekki. En ég svo sem veit jafn mikið um það og hver annar,“ segir Kolbeinn.

Rússar skulda íslenskum útgerðum á bilinu tvo til þrjá milljarða sem framkvæmdastjóri SFS segist vongóður um að verði greiddir og flutningaskipi með makríl og loðnu var snúið frá Rússlandi í dag.

Fulltrúar sjómanna og fiskverkafólks hafa hingað til ekki verið boðaðir til samráðsfunda í stjórnarráðinu en innflutningsbannið hefur líka áhrif á kjör þeirra. Það er þó ekki ólíklegt samkvæmt heimildum fréttastofunnar að þeir verði boðaðir til funda.