Miklar breytingar framundan í Færeyjum

Færeyska ríkisstjórnin féll í þingkosningunum sem fram fóru á þriðjudaginn. Javnaðarflokkurinn er stærsti flokkurinn eftir kosningarnar, með átta þingmenn af 33. Flokkurinn fékk rúmlega 25 prósent atkvæða og bætti við sig tveimur mönnum. Tjóðveldi er næst stærstur með sjö þingmenn en flokkurinn bætti við sig einum í kosningunum. Aksel Johannesen, leiðtogi jafnaðarmanna, sagði í samtali við Kringvarpið að hann ætlaði sér að reyna að mynda samsteypustjórn núverandi stjórnarandstöðuflokkum. Því er ljóst að um miklar breytingar er að ræða í færeyskum stjórnmálum.

Allt önnur leið sem kosin var

Guðrun í Jákupsstovu, færeyskur nemi í Háskóla Íslands, sem hefur verið í ungliðahreyfingu Tjóðveldisins segir að talið sé að Javnaðarflokkurinn, Tjóðveldið, nýr flokkur sem heitir Framsókn og mögulega Sjálfstæðisflokkurinn muni þá mynda stjórnarsamband. „Þetta er allt önnur leið sem fólk er búið að kjósa núna, bæði að kjósa vinstri stjórn yfir hægri stjórn, en líka út af baráttumálum samkynhneigðra,“ segir Guðrun. Sonja Jógvansdóttir var einn sigurvegara færeysku þingkosninganna en hún er fyrsti opinberlega samkynhneigði einstaklingurinn á færeyska þingið. Guðrun telur að í kjölfarið verði stutt í að hjónabönd samkynhneigðra verði leyfð í Færeyjum. Aðspurð um áhrif kosninganna á sjálfstæðisbaráttu Færeyja segir Guðrun að þrátt fyrir að vera ekki hlynntur sjálfstæði út á við séu skiptar skoðanir á því innan Javnaðarflokksins. Tjóðveldið er hins vegar hlynntur sjálfstæði og því gæti verið að ný stjórn myndi styðja sjálfstæðisbaráttuna.