Fernandez de Kirchner flutti tilfinningaþrungna kveðjuræðu

Cristina Fernandez de Kirchner, fráfarandi forseti Argentínu, flutti tilfinningaþrungna kveðjuræðu fyrir framan stuðningsmenn sína í höfuðborginni Buenos Aires í gærkvöldi.

Hægrimaðurinn Mauricio Macri, sem vann nauman sigur í síðari umferð forsetakosninganna í síðasta mánuði, mun taka við embættinu af Fernandez de Kirchner síðar í dag.

Fernandez de Kirchner hvatti Argentínumenn til að láta í sér heyra og mótmæla á götum úti, telji þeir sig svikna af nýrri hægristjórn í landinu, auk þess að hún varði stefnu stjórnar sinnar.

BBC greinir frá því að Macri þurfi að takast á við mikinn efnahagsvanda sem landið glímir við, þar sem verðbólga mælist nú nærri 15 prósent. Ýmsir sérfræðingar telja hins vegar verðbólgu í raun vera 25 prósent.

Erfiðlega hefur reynst fyrir Argentínumenn að laða að sér erlenda fjárfesta að undanförnu þar sem verð á ýmissi hrávöru hefur lækkað og gjaldeyrisforði landsins minnkað.

Argentínska ríkið fór í greiðsluþrot fyrir einu og hálfu ári og varð það í annað skiptið á þrettán árum sem ríkið náði ekki að greiða af skuldum sínum.

Nýr forseti hefur heitið því að í garð gangi nýtt tímabil breytinga og sáttar.