Setja skilyrði um erlent eignarhald til fimm ára

Fari svo að erlendir aðilar kaupi Íslandsbanka geta þeir ekki selt íslenskum aðilum bankann aftur næstu fimm árin, samkvæmt bréfi sem kröfuhafar Glitnis sendu stjórnvöldum rétt fyrir blaðamannafund um losun hafta á mánudaginn.

Samkvæmt heimildum Fréttablaðsins er skilyrðið komið frá kröfuhöfum sjálfum, en ekki íslenskum stjórnvöldum, í því skyni að fá sem mest virði af sölu bankans til erlendra aðila.

Undanfarin ár hafa eigendur Íslandsbanka horft til þess að bankinn verði seldur annaðhvort asískum fjárfestum eða tvískráður í Kauphöll á Íslandi og í Skandinavíu. Hefur þá einkum verið horft til kauphallarinnar í Noregi.

Páll Eiríksson, sem situr í slitastjórn Glitnis, túlkar fyrrgreinda grein í bréfi kröfuhafa til stjórnvalda þannig að í þessu felist að Íslandsbanki verði ekki í eigu innlendra aðila næstu fimm árin. „Þú sérð það nú bara á þessari tilkynningu sem er á vefnum hjá ráðuneytinu að þar eru menn að undirgangast það að bankinn verði ekki í eigu innlendra aðila að minnsta kosti næstu fimm árin,“ segir Páll. Og þá gefi það augaleið að bankinn verði ekki seldur innlendum aðila eða skráður hér á markaði.

Guðrún Johnsen, stjórnarmaður í Arion banka, lektor í fjármálum við viðskiptafræðideild HÍ og stjórnarmaður í Gagnsæi – samtökum gegn spillingu, telur jákvætt að erlendir aðilar eignist hlut í íslenskum bönkum. „Fyrir utan jákvæð áhrif á hugsanlega meiri fjölbreytileika í stjórnum bankanna þá er það svo að ef bankar lenda í vanda getur komið upp sú staða að hluthafar þurfi að leggja þeim til fé. Það yrði þá erlent greiðsluflæði inn í landið,“ segir Guðrún.

Frosti Sigurjónsson, formaður efnahags- og viðskiptanefndar þingsins, hefur aftur á móti sagt að það samrýmist ekki hugmyndum um efnahagslegan stöðugleika að selja bankana úr landi.