Homer og Marge skilja

Aðdáendur The Simpsons eru margir hverjir gríðarlega áhyggjufullir, en svo virðist sem Homer og Marge bindi enda á tuttugu og sjö ára hjónaband sitt í næstu seríu þáttanna. Lét Al Jean, einn framleiðenda þáttanna, hafa þetta eftir sér í viðtali á dögunum.

Jafnframt sagði hann að Homer yrði ekki lengi einsamall, því hann myndi fljótlega verða bálskotinn í lyfjafræðingi nokkrum, en Lena Dunham, aðalnúmerið í Girls-þáttunum, mun ljá henni rödd sína. 

Jean vildi þó ekki segja hvort skilnaður Marge og Homers væri kominn til að vera. Serían fer í loftið vestanhafs í september á þessu ári.