Hugsuðir miðla reynslu á TEDxReykjavík

Þetta hefur verið að vaxa mikið ár frá ári og er orðinn fastur liður í viðburðadagatali Reykjavíkur,“ segir Martin L. Sörensen, viðburðastjóri TEDxReykjavík. Viðburðurinn TEDxReykjavík verður haldinn í fimmta skipti í dag í Tjarnarbíói.

Um er að ræða viðburð sem færir áhorfendum nokkra áhugaverðustu hugsuði, listamenn og frumkvöðla sem Ísland hefur upp á að bjóða. Þá munu tveir erlendir mælendur flytja erindi. Hvor þeirra mun flytja stutt en innihaldsríkt erindi um málefni sem brennur á honum eða henni.

Þema viðburðarins í ár er „Ljós og skuggar“ og er markmiðið að einblína á atriði sem við sem samfélag kjósum oft að horfa ekki á en með því að taka erfiðum málum með opnum örmum verðum við sterkari.

TEDxReykjavík er byggt á sömu gildum og hugsjón og TED en TED er árlegur atburður þar sem leiðandi hugsuðum og athafnamönnum í heiminum er boðið að deila eldmóði sínum með öðrum. „TED“ stendur fyrir „Technology“, „Entertainment“ og „Design“ eða Tækni, skemmtun og hönnun.

TED-ráðstefnan var fyrst haldin í Monterey í Kaliforníu árið 1984.

„Það hefur komið til tals að fara með viðburðinn út á land en það hefur ekki gerst enn. Það væri hægt að halda til dæmis TEDxAkureyri, en við höfum ekki einkarétt á þessu á Íslandi og því geta fleiri sett upp TEDx-viðburð.“ segir Martin, spurður út í hvort viðburðurinn verði færður út á land á næstunni.

Martin bætir við að TEDxReykjavík sé alltaf með augun opin fyrir góðum hugmyndum og flottum ræðumönnum fyrir komandi viðburði.