Íbúar Tíkrit óttast átökin

Um 30 þúsund manna lið íraskra hermanna og stuðningsmanna þeirra er byrjað að herja á liðsmenn Íslamska ríkisins í borginni Tikrit í von um að ná henni aftur úr höndum þeirra.

Tíkrit er heimaborg Saddams Hussein. Vígamenn Íslamska ríkisins náðu henni á sitt vald í júní á síðasta ári. Þar hafa búið um 250 þúsund manns, en ekki er vitað hve mörgum hefur tekist að flýja undan ofríki vígasveitanna. Þetta er ein stærsta borgin sem vígasveitir Íslamska ríkisins hafa náð á sitt vald.

Herinn ætlar að senda 27 þúsund manns en að auki eru um 3.500 herskáir sjía-múslimar sagðir ætla að taka þátt í hernaðinum gegn Íslamska ríkinu. Bandaríkin og fleiri ríki hyggjast styrkja aðgerðirnar með loftárásum.

„Markmið okkar er að frelsa fólk undan þessum hryðjuverkahópum,“ sagði Haidar al Abadi, forsætisráðherra Íraks, á sunnudaginn og lagði á það sérstaka áherslu að vernda þyrfti almenna borgara og hús í Tíkrit.

Fregnir hafa borist af því að íbúar í Tíkrit og nágrenni óttist yfirvofandi átök um borgina og séu þegar byrjaðir að forða sér til norðurs og austurs.

Bandaríkin kynntu nýlega áform um að ná borginni Mosúl, sem er nokkru norðar, úr höndum Íslamska ríkisins með tilstyrk bæði íraska hersins og liðsmanna Kúrdasveita. Þetta myndi gerast í apríl eða í maí, væntanlega í framhaldi af þessum átökum um Tíkrit sem nú eru að hefjast.

Það virðist því ljóst að langvarandi stríðsátök séu að hefjast við vígasveitir Íslamska ríkisins í Írak.

Í gær hvatti Nickolaí Mladenov, fulltrúi Sameinuðu þjóðanna í Írak, alla þátttakendur í þessum átökum til þess að gæta sérstaklega að öryggi almennra borgara.

Þegar liðsmenn Íslamska ríkisins náðu á sitt vald stórum svæðum í vestanverðu Írak á síðasta ári flúðu íraskir hermenn unnvörpum miskunnarleysi innrásarliðsins og skildu víða eftir vopn sín og búnað.

Íbúarnir í þessum hluta Íraks eru flestir súnní-múslimar en stjórnin í Bagdad er að mestu í höndum sjía-múslima, sem njóta stuðnings frá Íran.

Íraski herinn hefur áður reynt nokkrum sinnum að ná Tíkrit úr höndum Íslamska ríkisins, en án árangurs.