Nýtt hótel á 10 til 15 milljarða króna

Bygging nýs hótels við Austurhöfn í Reykjavík hefst í haust gangi áætlanir eftir. Hótelið rís vestan við tónlistar- og ráðstefnuhúsið Hörpu, líkt og gert hefur verið ráð fyrir í skipulagi svæðisins.

Gert er ráð fyrir að bygging hótelsins taki tvö ár, að því er fram kom í máli Richards L. Friedman, forstjóra bandaríska fasteignafélagsins Carpenter & Company, sem annast byggingu hótelsins, á blaðamannafundi í Hörpu í gær, þar sem upplýst var um áformin.

Þá kom fram í máli Friedmans að fyrirtækið hefði og myndi hafa samstarf við innlenda verktaka, hönnuði og fleiri við verkið, en þegar hefur verið samið við verkfræðistofuna Mannvit og T.ark-arkitekta um hönnun og stjórnun framkvæmda.

Friedman sagði hins vegar ekki tímabært að upplýsa um hvaða hótelkeðja fengi inni í byggingunni, því enn væri verið að leggja lokahönd á samninga.

Greina ætti frá því eftir þrjár til fjórar vikur. 

Í spjalli við blaðamann upplýsti Friedman að kostnaður við byggingu hótelsins yrði í grennd við hundrað milljónir Bandaríkjadala, eða 10 til 15 milljarðar íslenskra króna.

„Í verkefni af þessari stærðargráðu og með þann árangur í huga sem á að ná dugar ekki að hafa neitt annars flokks,“ segir Friedman. Það eigi jafnt við um bygginguna sjálfa og innanstokksmuni. Allt verði fyrsta flokks.

„Staðsetning sem þessi á ekkert skilið nema það besta. Við ætlum að gera hlutina rétt í fyrstu tilraun.“

Dagur B. Eggertsson, borgarstjóri í Reykjavík, sagði í ræðu sinni fagnaðarefni að óvissunni væri eytt um framtíðaruppbyggingu við Hörpu.

„Þetta er mikið fagnaðarefni fyrir alla sem hafa komið að þessu húsi, þetta er fagnaðarefni fyrir Reykjavíkurborg og þetta er í raun ný vídd fyrir ferðaþjónustuna hjá okkur að fá hingað fimm stjörnu hótel.“ Það segir Dagur styrkja Reykjavík sem ráðstefnu- og fundaborg. 

„En síðast en ekki síst var orðið mjög tímabært að fara að fylla upp í holuna, því það var svona alveg á mörkunum að menn færu að aldursfriða hana,“ gantaðist Dagur í ræðu sinni.

Létt var yfir gestum í Hörpu í gær, enda útlit fyrir að loksins komi bygging í húsgrunninn sem staðið hefur tómur við hlið hússins.

Halldór Guðmundsson, forstjóri Hörpu, kvaðst ekki hafa miklar áhyggjur af því að nýtt hótel skyggði á Hörpu.

„Og þótt svo væri, þá vildi ég frekar að skyggði á húsið úr þessari áttinni en að hafa þess holu áfram hér við hliðina.“

Festu kaup á byggingarrétti hótelsins

Fasteignafélagið Carpenter og Company er alþjóðlegt fasteignafélag sem er sérhæft í uppbyggingu hótela.

Félagið hefur fest kaup á byggingarrétti fyrir hótel á Austurbakka 2 við Reykjavíkurhöfn (Hörpureitur) af fyrri eigendum og verður leiðandi fjárfestir í verkefninu.

Carpenter reisir á lóðinni 250 herbergja fimm stjörnu hótel, en í framhaldinu tekur leiðandi alþjóðleg hótelkeðja við rekstri þess. Hótelið hýsir líka veislu- og fundarsali, fjölda veitingastaða auk heilsulindar. 

Nýja hótelið á Hörpureitnum er fyrsta hótelverkefni Carpenter utan Bandaríkjanna, en þar hefur félagið starfað með hótelkeðjum á borð við St. Regis, Four Seasons, Marriott, Hyatt og Starwood. 

Kolufell ehf., seljandi byggingarréttarins, þróar áfram íbúða- og verslunarbyggð á suðurhluta lóðarinnar.