Hreindýraveiðar eru hundruð milljóna bransi

Efnahagsleg umsvif af hreindýraveiðum af Austurlandi eru umtalsverð. Hver veiðimaður eyðir að meðaltali 170 þúsund krónum í hverri ferð til Austurlands við hreindýraveiðar. Á milli 1.000 og 1.400 hreindýr eru veidd á ári hverju.

Þetta er niðurstaða rannsóknar Stefáns Sigurðssonar lektors og Guðmundar Kristjáns Óskarssonar dósents við Háskólann á Akureyri á hreindýraveiðitímabilinu árið 2013. Rannsóknin var gerð með því að senda spurningalista í tölvupósti  á 1.048 einstaklinga sem höfðu hreindýraveiðileyfi árið 2013. Þar af svöruðu 390 manns eða 31,7% þeirra sem fengu veiðileyfi árið 2013.



Hreindýraveiðin skapar 27 ársstörf

Samanlagt eyddu veiðimennirnir 134 milljónum króna á Austurlandi. Með margfeldisáhrifum  námu efnahagsleg áhrif veiðimanna á Austurlandi um 243 miljónum króna. Við þetta má bæta að oft eru veiðimenn ekki einir á ferð. Þeir sem ferðast með veiðileyfishafa eyða einnig í mat, drykk og gistingu. Því eru umsvif vegna hreindýraveiðinnar meiri en bara sem nemur þeim 134 milljónum sem  veiðileyfishafarnir sjálfir eyða.

Stefán segir að þjónusta við veiðileyfishafana eina skapi um 27 ársstörf á Austurlandi. Þó séu mun fleiri einstaklingar sem þjónusti veiðimenn enda sé það ekki fullt starf hjá neinum.

Samkvæmt rannsókninni gista 26 prósent veiðimanna í heimahúsi, 25 prósent gistu hjá leiðsögumanni og aðeins færri gistu í orlofshúsi. Að meðaltali greiddu veiðimenn sem borguðu fyrir gistingu um 8.000 krónur fyrir hverja nótt sem gist var.

Vaxtamöguleikar ef veiðimenn dvelja lengur á Austurlandi

Stefán telur að talsverðir vaxtamöguleikar séu í greininni. Sér í lagi vegna þess um hve skamman tíma flestir veiðimenn dvelji á svæðinu. Hann bendir á að 72% veiðimanna dvelji 3 daga eða skemur á Austurlandi. Þá búa um 86% veiðimanna utan Austurlands og heimsækja Austurland einungis til þess að veiða hreindýr.

„Við viljum meina að ferðaþjónustuaðilar eigi hreinlega að framkvæma könnun meðal þessara veiðimanna til þess að sjá hvað hægt sé að gera til þess að fá þá til að stoppa lengur,“ segir Stefán. Sem dæmi gætu veiðimenn tekið fjölskylduna með sér en þá þurfi hún að hafa eitthvað fyrir stafni.