Hagnaðurinn mun dragast saman

Hagnaður af reglulegri starfsemi Íslandsbanka nam 14,85 milljörðum króna á síðasta ári en heildarhagnaður bankans eftir skatta nam 22,75 milljörðum króna. Mismuninn má rekja til einskiptisliða, aðallega breytingar á virðismati eigna en einnig hagnaðar af sölu á fyrirtækjum. Heildarhagnaðurinn er um 319 milljónum króna minni en fyrir árið 2013. Hagnaður af reglulegri starfsemi eykst hins vegar um 2,68 milljarða króna.

Á fundi Birnu Einarsdóttur, forstjóra Íslandsbanka, og Jóns Guðna Ómarssonar fjármálastjóra með blaðamönnum í gær kom fram að þessir tveir þættir hafi sífellt minni áhrif á afkomu bankans og því megi búast við að ekki sjáist jafn háar tölur um hagnað á næstu árum og gerist nú. Birna bendir á að virðisbreyting eigna sé nú 7,8 milljarðar en hafi verið 18 milljarðar í fyrra. „Það er að koma meiri vissa í safnið,“ segir Birna og bendir á að þetta eigi eftir að fjara út með tímanum.

Ný útlán Íslandsbanka jukust úr 100 milljörðum króna árið 2013 í 165 milljarða á síðasta ári. Birna segir að níu mánaða uppgjör bankanna hafi bent til þess að Íslandsbanki hafi aukið markaðshlutdeild sína í útlánum. Hún bíði svo eftir því að sjá ársuppgjör hinna bankanna til að fá þessa tilfinningu sína staðfesta.

Birna leggur áherslu á að verulega hafi dregið úr rekstrarkostnaði bankans að undanförnu. Það hafi orðið fjögur prósent raunlækkun á liðnu ári en 20 prósent lækkun þegar litið er til síðustu þriggja ára. „Þetta hefur verið heljarinnar verk, bæði 250 starfsmenn sem við höfum fækkað um á undanförnum þremur árum og einföldun á starfseminni hvar sem við höfum getað. Þessi verkefni eru enn þá í gangi,“ segir Birna. Búist er við því að starfsmönnum bankans muni fækka um tíu prósent á næstu árum.

Þá segir hún að vaxtamunur bankans hafi lækkað frá fyrra ári og sé nú að ná jafnvægi í þremur prósentum. „Hann var mjög hár fyrstu árin eftir hrun vegna þess að hluti af því var tengt því að það var svo mikið misvægi á milli innlánsvaxtanna á lánum sem við vorum að taka yfir í íslenskum krónum og svo var stór hluti af erlendum lánum á erlendum vöxtum,“ útskýrir Birna. Hluti af matinu á lánasafninu hafi falist í því að jafna þetta eins mikið og hægt væri. Þessi mismunur hafi því verið inni í vaxtatekjunum fyrstu árin en síðan jafnast út. „En við sögðum alltaf á þessum fundum að við höldum að þetta verði í þremur prósentum,“ segir hún.

Spurð hvort góð afkoma bankans verði til þess að hægt verði að minnka vaxtamun enn frekar eða lækka gjöld á viðskiptavini segir Birna að nú þegar óreglulegir liðir detti út sé horft til þess að styrkja frekar undirliggjandi rekstur bankans. „Mér finnst ég ekki vera komin þangað sem ég vil vera með hann. Þannig að það er töluvert erfitt í því. Við erum bara að vinna að því. Við erum að vinna að einföldun í kerfunum okkar og að sjálfsögðu vonum við að við getum skilað því. En það er þó þannig að það er mikil samkeppni á útlánamarkaði,“ segir Birna og bendir á að þessi samkeppni komi viðskiptavinum bankans til góða.