Eignaðist fimm börn á þremur árum: „Hvernig á ég að fara að þessu?“

Ósk Stefánsdóttir og eiginmaður hennar, Bandaríkjamaðurinn Greg Eiden, eiga líklega Íslandsmet í að eignast mörg börn á skömmum tíma. Þeim fæddust tvíburadætur árið 2010 og þegar þau ætluðu sér að bæta við þriðja barninu varð Ósk ófrísk að þríburum.

„Börnin urðu því fimm á þremur árum,“ segir Ósk í fyrsta þætti af Margra barna mæðrum sem er í umsjón Sigrúnar Óskar Kristjánsdóttur og verður sýndur á Stöð 2 í kvöld.

Í þættinum kemur einnig fram að Ósk hafi brostið í grát í sónarskoðun hjá lækni sem tilkynnti henni að fóstrin væru ekki eitt og ekki tvö, heldur þrjú. „Ég sagði bara: Hvernig á ég eiginlega að fara að þessu?“ Maðurinn hennar gat hins vegar ekki hætt að hlæja. Bæði eru sammála um að það hafi á margan hátt verið auðveldara að hugsa um þríbura en tvíbura, enda hafi þau verið komin í góða æfingu.

Þátturinn er á dagskrá Stöðvar 2 í kvöld kl. 20.05 en meðfylgjandi er stutt myndbrot.