Arnór hafði betur gegn Ásgeiri og Snorra

Landsliðsfélagarnir Arnór Atlason annars vegar og Snorri Steinn Guðjónsson og Ásgeir Örn Hallgrímsson hins vegar áttust við þegar lið þeirra. St. Raphael og Nimes, mættust í frönsku úrvalsdeildinni í kvöld.

Svo fór að St. Raphael hafði betur, 35-33, en Arnór skoraði þrjú mörk í fimm skotum fyrir liðið. Hann brenndi reyndar af einu víti í leiknum.

Snorri Steinn var að venju atkvæðamikill í liði Nimes en hann var markahæstur í leiknum með níu mörk úr þrettán skotum. Ásgeir Örn skoraði tvö mörk úr sjö skotum.

Jafnræði var með liðunum allan leikinn en St. Raphael náði að síga fram úr á lokamínútunum. St. Raphael er í öðru sæti deildarinnar með tólf stig en Nimes því fimmta með níu stig.