Alfreð nú orðaður við Augsburg

Alfreð Finnbogason gæti verið á leið frá Olympiacos strax í janúar ef marka má fréttir sem birtust í Grikklandi í morgun.

Samkvæmt þeim hefur þýska úrvalsdeildarliðið Augsburg áhuga að fá Alfreð í sínar raðir en liðið er nú í tólfta sæti þýsku úrvalsdeildarinnar.

Alfreð hefur einnig verið orðaður við Celtic í Skotlandi og Genk í Belgíu síðustu daga en samkvæmt frétt Scottish Sun í gær vill Real Sociedad, sem lánaði Alfreð til Olympiacos í haust, fá fjórar milljónir evra fyrir landsliðsmanninn.

Sjá einnig: Alfreð sagður of dýr fyrir Celtic

Það mun vera of há fjárhæð að mati Celtic en óvíst er hvort að forráðamenn Augsburg hafi áhuga á að kaupa Alfreð eða fá hann að láni frá spænska liðinu.