Samkomulag um sameiningu Straums og MP banka

Stjórnir Straums fjárfestingabanka hf. og MP banka hf. hafa náð saman um helstu skilmála varðandi samruna bankanna tveggja. Er samkomulagið gert með fyrirvara um samþykki hluthafafunda og eftirlitsaðila sem og um niðurstöður áreiðanleikakannanna.

Nú taka við viðræður um nánari útfærslu á sameiningu bankanna sem og áreiðanleikakannanir sem síðan verða lagðar fyrir hluthafa til endanlegs samþykkis.

Í tilkynningu segir að sameiningin muni hafa í för með sér „augljósan ávinning fyrir hluthafa félaganna“, ef hún gengur eftir. Þá segir:

„Jafnframt getur sameinaður banki eflt og bætt þjónustu við viðskiptavini

og verið áhugaverður og metnaðarfullur vinnustaður. Sameinaður banki mun horfa til sóknarfæra á sviði eignastýringar og fjárfestingabankastarfsemi og yrði hann með sterka stöðu á íslenskum fjármálamarkaði á þeim sviðum. Sameinaður banki hefur jafnframt trausta eiginfjárstöðu og styrk til að veita fjárfestum, sparifjáreigendum og atvinnulífi sérhæfða bankaþjónustu.“