Straumur hagnast um 225 milljónir

Straumur fjárfestingabanki hagnaðist um 225 milljónir króna á síðasta ári. Arðsemi eigin fjár var 12%.

Heildareignir bankans í árslok 2014 námu rúmum 19 milljörðum króna, eiginfjárhlutfall var 29% og eigið fé 2.486 milljónir króna. Laust fé var 6.681 milljónir króna eða rúmlega þriðjungur af heildareignum segir í tilkynningu frá bankanum.

Eiginfjárkrafa vegna áhættu í efnahagsreikningi bankans er um 219 milljónir króna eða um 13% af eiginfjárgrunni.

Jakob Ásmundsson, forstjóri Straums, er sáttur með frammistöðu bankans á árinu 2014.

„Árið var bæði viðburðaríkt og farsælt. Meirihluti í bankanum var seldur til nýrra hluthafa á miðju ári og afkoman á síðari hluta ársins skilaði hluthöfum góðri arðsemi. Straumur keypti á árinu ráðandi hlut í Íslenskum verðbréfum og 20% hlut í MP banka. Undir lok ársins var hlutafé bankans aukið til að styðja við áframhaldandi ytri vöxt. Við horfum því full tilhlökkunar fram á veginn," segir Jakob í tilkynningu.