Mikilvægur sigur Grindavíkur í kaflaskiptum leik

Grindavík vann mikilvægan sigur í baráttunni um sæti í úrslitakeppni karla í körfubolta. Fjölnismenn lágu í valnum í Grindavík í kvöld, en lokatölur urðu 89-75 sigur Grindavíkur.

Heimamenn í Grindavík byrjuðu betur og unnu fyrsta leikhluta örugglega 24-11. Einhverjir héldu þá að um göngutúr í garðinum væri að ræða fyrir Grindavík, en gestirnir úr Grafarvogi mættu sterkir inn í annan leikhlutann.

Gestirnir unnu hann með fjórtán stigum og leiddu í hálfleik með eins stigs mun, 40-39. Grindavík náði aftur undirtökunum í þriðja leikhlutanum og leiddu með þremur stigum fyrir lokaleikhlutann; 65-62.

Í fjórða leikhlutanum reyndust heimamenn í Grindavík sterkari, en þeir unnu að lokum fjórtán stiga sigur; 89-75.

Rodney Alexander spilaði vel í liði Grindavíkur, en hann skoraði 28 stig, tók ellefu fráköst og gaf þrjár stoðsendingar. Þrír aðrir leikmenn auk Rodney skoruðu yfir tíu stig.

Hjá Fjölni var Jonathan Mitchell í algjörum sérflokki, en hann skoraði 35 stig, tók tólf fráköst og gaf tvær stoðsendingar. Davíð Ingi Bustion kom næstur með tólf stig.

Grindavík skaust með sigrinum upp fyrir Þór Þorlákshöfn og Keflavík og upp í sjötta sæti deildarinnar, en Keflavík á þó leik til góða á morgun.

Fjölnir situr í næst neðsta sæti deildarinnar með tíu stig, jafn mörg og ÍR sem er í sætinu fyrir ofan. ÍR á þó leik til góða. Skallagrímur er á botninum með átta.

Tölfræði leiks:

Grindavík-Fjölnir 89-75 (24-11, 15-29, 26-22, 24-13)

Grindavík: Rodney Alexander 30/11 fráköst, Oddur Rúnar Kristjánsson 16, Ólafur Ólafsson 15/7 fráköst, Jón Axel Guðmundsson 14/8 fráköst/10 stoðsendingar, Daníel Guðni Guðmundsson 8, Ómar Örn Sævarsson 6/12 fráköst, Þorsteinn Finnbogason 0, Hilmir Kristjánsson 0, Hinrik Guðbjartsson 0, Magnús Már Ellertsson 0, Nökkvi Harðarson 0, Þorleifur Ólafsson 0.



Fjölnir: Jonathan Mitchell 35/12 fráköst, Davíð Ingi Bustion 12/9 fráköst, Róbert Sigurðsson 7/4 fráköst/10 stoðsendingar, Sindri Már Kárason 6/7 fráköst, Danero Thomas 5, Emil Þór Jóhannsson 4, Valur Sigurðsson 4, Garðar Sveinbjörnsson 2, Hreiðar Bjarki Vilhjálmsson 0, Bergþór Ægir Ríkharðsson 0, Árni Elmar Hrafnsson 0, Alexander Þór Hafþórsson 0.