Ellefu missa vinnuna við lokun útibúa Landsbankans

Landsbankinn hefur ákveðið að sameina útibú á Vestfjörðum sem áður tilheyrðu Sparisjóði Norðurlands, við útibú Landsbankans á Ísafirði. Síðasti afgreiðsludagur útibúanna á Suðureyri og Bolungarvík verður 24. september, en póstafgreiðsla  á vegum bankans í Bolungarvík verður opin til 30. október, að því er fram kemur í tilkynningu frá Landsbankanum.

Þar segir að ákveðið hefur verið að sameina einnig afgreiðslu Landsbankans á Þingeyri útibúinu á Ísafirði. Síðasti afgreiðsludagur á Þingeyri verður 24. september.

Hluti starfsfólks í útibúinu í Bolungarvík mun hefja störf í útibú Landsbankans á Ísafirði en samtals láta 11 manns af störfum vegna þessara breytinga.

Við sameininguna verður til stórt öflugt útibú á Ísafirði sem þjónar norðanverðum Vestfjörðum og ætlað er að veita víðtækari þjónustu en áður. Af hálfu bankans er áhersla lögð á að viðskiptavinir verði sem minnst varir við breytingar og að þjónusta skerðist eins lítið og unnt er.

Miklar breytingar hafa orðið á rekstrarumhverfi banka á undanförnum árum. Meira en 80% allra samskipta viðskiptavina við banka eru nú rafræn og þetta hlutfall fer hækkandi. Landsbankinn segir síður þörf fyrir hefðbundin útibú og afgreiðslur en verið hefur vegna þess að 80 prósent allra samskipta viðskiptavina við banka eru rafræn og að það hlutfall fari hækkandi. Þá er sögð afar rík krafa um hagræðingu í bankakerfinu í heild og leggur Landsbankinn áherslu á að draga úr kostnaði í sínum rekstri.

Á öðrum afgreiðslustöðum Sparisjóðs Norðurlands mun Landsbankinn áfram halda úti starfsemi, þ.e. Dalvík, Þórshöfn, Raufarhöfn og Kópaskeri. Segist Landsbankinn ætla að halda áfram rekstri útibúanets á landinu. Eftir samruna við Sparisjóð Vestmannaeyja og Sparisjóð Norðurlands hefur útibúum og afgreiðslum Landsbankans fjölgað á ný og eru nú 37 talsins.

Samruni Landsbankans og Sparisjóðs Norðurlands tók formlega gildi 4. september, eftir að hafa hlotið samþykki viðeigandi eftirlitsaðila. Frá þeim tíma tók Landsbankinn formlega við öllum skuldbindingum sjóðsins.