Mel B ýjar að endurkomu Spice Girls

Fyrrum Kryddpían Mel B ýjaði að því á dögunum að hin goðsagnakennda popphljómsveit Spice Girls gæti komið saman að nýju á næstunni.

Það gerði hún í nýársþætti spjallþáttastjórnandans Alan Carr en þátturinn verður sýndur á Bretlandseyjum á gamlársdag. Þar sagði hún að það væri allt að því „dónalegt“ ef hljómsveitarmeðlimirnir gerðu ekkert í tilefni 20 ára afmælis sveitarinnar – sem þó var á síðasta ári.

„Ég held að ég sú eina sem slengir fram öllum þessum orðrómum. En í fúlustu alvöru, við áttum 20 ára afmæli í fyrra og það væri dónalegt að fagna því ekki svo að vonandi ætti eitthvað að gerast fljótlega.“

Þegar hún var spurð að því hvað það gæti verið bætti hún við: „Ég get ekki sagt þér það strax.“

Mel, sem stundum gekk undir nafninu Scary Spice meðan hún var enn í Kryddpíunum, sagðist þó geta greint frá því að yfirlýsing væri væntanleg. „Við erum að reyna að átta okkur á hlutunum. Þegar þeir liggja allir fyrir getum við gefið upp smáatriðin en þangað til er voða lítið sem hægt er að segja. Þetta er eins og þegar þú ert að hitta einhvern og allir eru að þvinga ykkur til að ganga í hið heilaga. Þú veist, við munum alveg gera það – gefið okkur bara smástund til að átta okkur!“ sagði Mel B.

Kryddpíurnar voru einhver vinsælasta hljómsveit tíunda áratugarins en sveitin var stofnuð árið 1994. Hún var lengt af skipuð 5 söngkonum og starfaði samfellt til 2001. Hljómsveitin kom aftur saman tímabundið á tónleikum í desember 2007 og á Ólympíuleikunum í London 2012.