Blaðamaður The Guardian segir Sollu Eiríks besta hráfæðikokk Evrópu

Blaðamaður breska blaðsins The Guardian fer mjög fögrum orðum um Sollu Eiríks í grein sem birtist á vefnum í gær. Segir hana besta hráfæðikokk Evrópu.



Kate Magic er ekki spör á jákvæð lýsingarorð þegar hún segir frá Sollu í umfjöllun sinni um hráfæðimenningu Evrópu. 

Í greininni telur hún upp góða veitingastaði í Evrópu sem sérhæfa sig í að matreiða hráfæði en uppáhalds staðinn sinn af þeim öllum segir hún vera Gló. 

Aðrir staðir sem eru í uppáhaldi hjá blaðakonunni eru m.a. 42 Degrés í París og Nama í London. 

Hún dásamar jafnframt Sollu fyrir sitt innlegg í matarmenningu landans og talar um Sollu vörurnar með appelsínugula miðanum sem finna má í mörgum matvöruverslunum á landinu

„Maður hefði kannski haldið að Ísland væri aðeins á eftir með menningarstraumana, en svo er ekki. Hvort sem þú ert að leita að klórella töflum, maca dufti eða hráfæði tahini og kelp núðlum þá eru góðar líkur á að þú finnir þetta í fyrstu versluninni sem þú stígur fæti inn í."

Solla segir greinina hafa komið sér á óvart en að vissulega þyki sér hólið skemmtilegt:

„Við erum að fá svo mikið af frábærum kommentum á Trip Advisor þannig að þetta er bara gaman," segir Solla sem hefur meðal annars eldað fyrir stórstjörnurnar Ben Stiller og Sean Penn. 

Gaman er að geta þess að Gló opnaði tvo nýja staði fyrir skemmstu. Einn í Faxafeni og annan í Kópavogi.