Búast við tíu milljörðum til hluthafa

Búist er við því að 10 milljarðar íslenskra króna falli hluthöfum hlutafélaga í Kauphöll Íslands í skaut á næstunni í gegnum arðgreiðslur og gegnum kaup fyrirtækjanna á eigin bréfum á þessu ári. Þetta kemur fram í greiningu greiningardeildar Íslandsbanka.

Greiningardeildin telur auknar arðgreiðslur félaga vera merki um hversu ólíkur hlutabréfamarkaðurinn sé í dag miðað við árin fyrir hrun. „Félög eru ekki í útrás eða að vaxa með öðrum hætti og koma því í auknum mæli fjármunum áfram til hluthafa.“

Þrír stærstu leggja til talsverðan arð

Þrjú stærstu félögin í Kauphöll Íslands, Icelandair, Össur og Marel, hafa þegar birt uppgjör fyrir árið 2014. Uppgjör Össurar og Marels voru ágæt að mati greiningardeildarinnar en afkomuspá Icelandair var töluvert lakari en margir markaðsaðilar höfðu væntingar. Þær væntingar voru hugsanlega óraunhæfar vegna gengis evrunnar og mikillar samkeppni á flugmarkaði samkvæmt greiningunni.

Félögin þrjú hafa öll lagt til talsverðar arðgreiðslur á þessu ári. „Stjórn Icelandair, Össur og Marel hafa þegar birt tillögu að arðgreiðslu en ákvörðunarvald er í höndum hluthafafundar. Stjórn Össurar leggur til 0,12 danskra krónu greiðslu á hlut eða sem svarar 14% hagnaðar. Stjórn Icelandair leggur til að samtals verði greiddir 2,5 milljarðar króna í arð eða 0,5 krónur á hlut. Stjórn Marel leggur til að greiddar verði 0,48 evrur á hlut eða samtals 3,5 milljónir evra í arð. Gróft áætlað eru þessi félög því samtals að greiða um 4 milljarða króna í arð,“ segir í greiningunni. 



Von á frekari arðgreiðslum á næstunni

Þá er einnig búist við því að þau fjölmörgu fyrirtæki sem muni birta uppgjör á næstu tveimur vikum greiði hluthöfum myndarlegan arð. „Reginn greiðir þó væntanlega ekki arð enda félagið enn að stækka og Vodafone heldur væntanlega frekar áfram að koma fjármunum áfram til hluthafa með hóflegum endurkaupum eigin bréfa. Flestir hafa væntingar um myndarlegar arðgreiðslur frá tryggingarfélögunum enda boðar arðgreiðslustefna þeirra útgreiðslu bróður hluta hagnaðar. Þá gaf tilkynning með síðasta uppgjöri Haga til kynna að félagið hygðist breyta að einhverju marki stefnu sinni hvað varðaði ráðstöfun fjármuna og er því möguleiki á að þeir muni í auknum mæli ráðstafa  þeim til hluthafa.“ Hagar birta þó ekki sitt uppgjör fyrr en í maí.

Þá er gert ráð fyrir að þrjú félög verði skráð á árinu, Reitir, Eik og Skipti sem er móðurfélag Símans. „Leiða má líkur að því Reitir stækki ekki mikið meira og verði því arðgreiðslufélag, líklegra er að Eik vilji stækka en slíkur vöxtur myndi væntanlega tefja arðgreiðslur. Erfiðara er að segja til með Skipti  án þess að þekkja fjárfestingarþörf en félagið stækkar þó varla og því líkur á að einhverjum fjármunum verði komið til hluthafa,“ segir í greiningu Íslandsbanka