Meira selt af skóm en fötum fyrir jólin

Í upphafa jólaverslunar í nóvember minnkaði fataverslun um 3,1 prósent í nóvember í samanburði við sama mánuð í fyrra að nafnvirði. Skóverslun jókst hins vegar um 9,3 prósent, þetta kemur fram í tilkynningu frá Rannsóknasetri verslunarinnar.

Upphaf jólaverslunnar skiptist í tvö horn eftir tegundum. Á meðan aðeins 0,4% nafnaukning varð í veltu dagvöruverslana frá sama mánuði í fyrra, jókst sala á minni raftækjum um 39,5% og 19,8% aukning varð á sölu stórra raftækja. Sú nýjung hjá mörgum íslenskum verslunum að bjóða vörur á tilboðsverði á Svörtum föstudegi (Black Friday) í lok nóvember virðist hafa skilað mismikilli veltuaukningu eftir tegundum verslana. Á meðan heimilistæki og húsbúnaður seldist í miklum mæli var ekki sama ris í sölu á nauðsynjum eins og matvöru og fatnaði.

Fataverslun minnkaði um 3,1% í nóvember í samanburði við sama mánuð í fyrra að nafnvirði. Verð á fötum var 3,1% lægra en fyrir ári síðan samkvæmt verðmælingu Hagstofunnar og jókst velta fataverslana því um 0,3 að raunvirði. Þannig virðist ljóst að aðgerðir ýmissa fataverslana, sem fólust í verðlækkun á fötum til að hvetja til aukinna kaupa, hafi ekki skilað sér í heildina tekið. Skýringuna má e.t.v. leita í auknum kaupum á fötum frá útlöndum, ýmist í gegnum netverslanir eða í ferðum landsmanna til útlanda.

Þó landsmenn hafi verið tregir til fatakaupa í upphafi jólaverslunarinnar verður hið sama ekki sagt um skóverslun, sem jókst í nóvember um 9,3% að nafnvirði. Verð á skóm hækkaði lítillega nóvember.

Uppgangur hefur verið í byggingarvöruverslun að undanförnu: Í nóvember var veltan 10,1% meiri að nafnvirði en í nóvember í fyrra. Ef velta í byggingavöru síðustu sex mánaða er borin saman við veltu á sama tímabil í fyrra sést að hún hefur aukist um 8,6% að nafnvirði í ár og 10,1% að raunvirði. Að baki þessari aukningu eru bæði nýbyggingar og endurnýjun á eldra húsnæði.

Athygli vekur að sala farsíma í síðasta mánuði dróst saman um 1,4% frá í nóvember í fyrra. Þetta þýðir samt ekki að landsmenn séu hættir að endurnýja snjalltæki sín - öðru nær. Ástæða minni sölu nú en í fyrra er sú að í samanburðarmánuðinum í fyrra varð sprenging í sölu farsíma. Í þeim mánuði jókst salan um 141% frá árinu þar á undan. Ef sala á snjallsímum síðustu sex mánaða er borin saman við sömu sex mánuði í fyrra sést að veltan í ár hefur aukist um 30,9% að nafnvirði og 35,6% að raunvirði á þessu tímabili.