Rekstur Reykjavíkurborgar neikvæður um 2,4 milljarða

Rekstrarniðurstaða samstæðu Reykjavíkurborgar, A og B hluta, var neikvæð um 2,4 milljarða króna á fyrsti níu mánuðum ársins .Áætlun gerði hins vegar ráð fyrir jákvæðri niðurstöðu um 6,3 milljarða. Rekstrarniðurstaðan er því 8,7 milljörðum lakari en gert var ráð fyrir.

Helstu ástæður neikvæðs reksturs má meðal annars rekja til minni hagnaðar Orkuveitu Reykjavíkur vegna gjaldfærslu gangvirðisbreytinga innbyggðra afleiða í raforkusamningum vegna lækkandi álvers og hins vegar til lakari afkomu A hluta heldur en áætlun gerði ráð fyrir.

Rekstrarniðurstaða fyrir fjármagnsliði var jákvæð um tæplega 6 milljarða sem er 7,7 milljörðum lakari niðurstaða en gert var ráð fyrir.

Í lok tímabilsins námu heildareignir samstæðunnar 515 milljörðum króna, heildarskuldir ásamt skuldbindingum námu 299 milljörðum króna og eigið fé nam 216 milljörðum króna, þar af nam hlutdeild meðeigenda 11,9 milljörðum króna. Eiginfjárhlutfall samstæðunnar er 42 prósent en var 43,1 prósent um síðustu áramót.

Lakari rekstrarniðurstaða A-hluta sem nam 8,8 milljörðum króna, skýrist að langstærstum hluta af gjaldfærslu lífeyrisskuldbindinga að fjárhæð 10 milljarða króna, eða 8,3 milljörðum króna umfram áætlun.

Niðurstaðan kemur ekki á óvart

Björn Blöndal, formaður borgarráðs, segir niðurstöðuna ekki koma sér á óvart. „Afkoman er í sjálfu sér að batna miðað við sex mánaða uppgjörið, það er í sjálfu sér jákvætt. Það sem er auðvitað að setja samstöðuna í neikvæða afkomu eru hlutir sem eru tengdir álverði og öðru hjá Orkuveitunni og svo lífeyrisskuldbindinginn. Mínusinn er um átta milljarða en gjaldfærslan á lífeyrisskuldbindingum er tíu miljarða. Þannig að það má segja að það sé ákveðið jafnvægi í sjálfum rekstrinum miðað  við allt. En þessi lífeyrisskuldbinding er að slá okkur illa," segir Björn og bætir við að mikilvægt sé að fólk átti sig á því að þetta sé reiknuð stærð.

Björn segir að launahækkanir hafi haft áhrif á reksturinn. „Launaliðurinn hefur hækkað mikið. Það var búið að áætla fyrir honum að stóru leyti. En auðvitað eru launahækkanirnar orðnar mjög miklar og við erum ekki komnir með tekjur til að vega á móti þessari hækkun."

„Það er ljóst að þetta ár verður erfitt og stefnir í að útkoman verði ekki góð. En við erum búin að setja upp mjög markvissa aðgerðaráætlun til að herða tökin á rekstrinum," segir Björn.