Móðir Byrgisstúlku: „Hún var að drepa sig úr neyslu“

Pétur Hauksson, geðlæknir og fyrrverandi formaður Geðhjálpar, vakti athygli á óhefðbundinni starfsemi í Byrginu árið 2002. Þetta kom fram í Héraðsdómi Reykjavíkur í morgun.

Kona á þrítugsaldri fer fram á að íslenska ríkið viðurkenni að það hafi brugðist henni og hún fyrir vikið orðið út undan. Konan er ein þeirra sem Guðmundur Jónsson, forstöðumaður í vímuefnameðferðar- og endurhæfingarheimilinu Byrginu var dæmdur fyrir kynferðisbrot gegn árið 2008.

Konan bar einnig vitni í morgun þar sem hún sagðist enn bera þess bætur hvað gekk á í Byrginu á sínum tíma. Hún fúnkeraði ekki í vinnu, eignaðist ekki vini auk þess að glíma við búlemíu og fleiri vandamál.

Sjá einnig:Treystir engum, getur ekki eignast vini og helst ekki í vinnu

„Ég skrifaði bréf til landlæknisembættisins á sínum tíma og fékk fá svör. Eftirlitsvald ríkisins brást algjörlega sínu eftirlitshlutverki. Heilbrigðisráðherra hafði á þeim tíma skilgreint staðinn í tvígang sem heilbrigðisstofnun en ég veit ekki til þess að það hafi verið eitthvað eftirlit með staðnum,“ sagði Pétur.

Ríkið hafi brugðist

Pétur sendi alþingismönnum svo tillögu árið 2007 um hvernig bregðast ætti við þeim skaða sem vistmenn hefðu orðið fyrir. Um var að ræða fjögurra þrepa áætlun.

„Þá vakti ég athygli á því kynferðislega sambandi sem átti sér stað milli starfsfólks og vistmanna innan Byrgisins,“ sagði Pétur. Þá hafði frétta- og skýringaþátturinn Kompás þegar svipt hulunni af starfseminni í Byrginu eða í desember 2006.

Móðir konunnar bar vitni í héraðsdómi í morgun og var hún spurð út í aðdraganda þess að dóttir hennar var vistuð í Byrginu. 

Var að drepa sig úr neyslu

„Hún var búin að vera í mikilli neyslu allt sumarið og við vorum ítrekað búin að reyna koma henni í meðferð á Bugl, Vogi og Stuðlum. Hún komst aldrei inn á Bugl, þrátt fyrir ítrekað tilraunir.“

Móðirin segir engin úrræði séu til staðar fyrir ungt fólk.

„Það var enginn aðstoð til staðar og hún var að drepa sig úr neyslu. Ég skrifaði landlækni bréf eitt sumarið en ástandið var orðið svo slæmt að endurlífga þurfti dóttir mína í tvígang þetta sumar. Ég fæ svar um að það sé lítið sé hægt að gera.“

Móðurinn segir að því næst hafi hún ákveðið að koma fram í viðtali við DV þar sem hún hafi gagnrýnt kerfið mjög harkalega. Eftir viðtalið hafi kona haft samband við hana og látið hana vita af starfsemi Byrgisins.

„Um mánuði síðar vildi dóttir mín fara inn og í meðferð,“ sagði hún í Héraðsdómi Reykjavíkur í morgun en vitnisburður hennar tók mjög á hana.

Fegin að það vildi einhver taka við henni

„Ég man í raun ekki hvernig mér leist á Byrgið í fyrstu, ég man bara hvað ég var fegin að það vildi einhver taka við henni, og að hún vildi sjálf fara þarna inn. Hún var gríðarlega veik og við það að drepa sig úr neyslu á þessum tíma.“