Stefnir ríkinu: Treystir engum, getur ekki eignast vini og helst ekki í vinnu

Kona á þrítugsaldri fer fram á að íslenska ríkið viðurkenni að það hafi brugðist henni og hún fyrir vikið orðið út undan. Konan er ein þeirra sem Guðmundur Jónsson, forstöðumaður í vímuefnameðferðar- og endurhæfingarheimilinu Byrginu var dæmdur fyrir kynferðisbrot gegn árið 2008. Guðmundur var dæmdur í 2,5 árs fangelsi í Hæstarétti þar sem miskabætur konunnar voru lækkaðar úr einni milljón króna í átta hundruð þúsund. Ekki er þó farið fram á neinar bætur á þessu stig málsmeðferðarinnar.

Aðalmeðferð málsins fór fram í málinu í Héraðsdómi Reykjavíkur í dag þar sem konan bar vitni. Rifjaði hún upp á hve slæmum stað hún var á táningsaldri. Móðir hennar hafi leitað út um allt að úrræðum en ekkert gert fyrr en birt var blaðagrein í fjölmiðlum.

„Ég hafði farið í afvötnun á Vogi og Stuðla áður,“ sagði konan í dómssal í morgun. Í kjölfar þess að viðtal birtist við móður hennar hafi þeim verið bent á möguleika á að fá bót meina sinna í meðferð í Byrginu.

„Þá var ég í mikilli neyslu, bjó á götunni og mjög illa haldin.“

Hún rifjar upp vist sína á afvötnunardeild fyrstu mánuðina en hún hafi strax fengið á tilfinninguna að aðstæður væru óvenjulegar.

„Ég var stundum frekar hrædd og var meðal annars með dæmdum morðingja á deild. Þetta var skrítinn staður. Þú máttir reykja inni og vera með hund.“

Sjá umfjöllun fréttastofu Stöðvar 2 um Byrgismálið hér að neðan

Brotin fleiri en þrjú

Í dómi Hæstaréttar frá því í desember 2008 kemur fram að konan var vistmaður í Byrginu frá því í október 2003 til febrúar 2005. Var Guðmundur dæmdur fyrir að hafa tvívegis á þessu tímabili haft við hana kynferðismök og þar með brotið 197. grein Almennra hegningarlaga er snúa að ábyrgð umsjónarmanna eða starfsmanna stofnana. Þá var tiltekið þriðja kynferðisbrot sem Guðmundur var sýknaður af þar sem konan var ekki vistmaður í Byrginu þegar samræðið átti sér stað.

Konan er ósátt við að rannsakendur hafi komist að þeirri niðurstöðu að Guðmundur hafi brotið á henni í þrígang. Tilfellið sé að brotin hafi verið mun fleiri.

„Ég veit ekki hvernig þeir fengu þá tölu út, ég var beðin um að nefna nokkur dæmi og nefndi þau atvik en þetta átti sér stað linnulaust í eitt og hálft ár. Ég var misnotuð í Byrginu, heima hjá Guðmundi, í bílnum hans og til dæmis í vinnunni hjá mér,“ sagði konan sem starfaði á hóteli. Aðstoðaði Guðmundur hana við að fá starf á hótelinu.

Að sögn konunnar hefur hún alls ekki náð sér af því sem á undan er gengið. Fyrir vistun hafi hún verið greind með geðhvarfasýki og þunglyndi. Í dag sé hún með búlemíu, geðhvarfasýki, áfallastreituröskun og ofsakvíða.

„Ég er einnig fíkill en hef verið edrú í sjö og hálft ár.“

Taldi Guðmund geta læknað sig með aðstoð guðs

Konan segir að afar algengt hafi verið að vistmenn í Byrginu hafi misnotað lyf sem læknir skrifaði upp á fyrir vistmenn.

„Ég leit upp til Guðmundar og hann var mjög sannfærandi. Ég kom inn algjörlega brotinn og hann sagði við mig að hann væri með einu lausnina,“ sagði konan. Hann hafi virst vera með öll svör á reiðum höndum.

„Eftir nokkra mánuði gat ég ekki farið í viðtal til hans án þess að hann talaði um kynlíf. Hann sagði að það væri eina lausnin út úr vandanum og að BDSM-lífsstíllinn væri lækningamáttur við þunglyndi og fíkn. Ég taldi í raun að Guðmundur væri læknir og treysti honum fullkomlega,“ sagði konan í morgun. Hún hafi kannski ekki talið Guðmund læknismenntaðan en geta læknað sig með aðstoð guðs.

„Það sem liggur mér þyngst á hjarta og ástæðan fyrir því að ég er komin hingað er að þetta var ósanngjarnt. Ég er komin hingað til þess að fá viðurkenningu á brotinu. Ég vil að þetta mál hafi fordæmi og það verði til þess að ungu fólki verði hjálpað sem verið er að misnota,“ sagði konan við skýrslutöku í morgun. Enginn hafi verið til staðar til að vernda hana og hún beri þess enn bætur í dag.

„Ég treysti engum, ég get ekki eignast vini og ég helst ekki í vinnu. Ég neita að vera öryrki alla mína ævi. Ég vil stunda nám en það er gríðarlega erfitt. Það er ótrúlega erfitt að breyta þeim spilum sem ég fékk útdeilt. Hann misnotaði ellefu stúlkur á tíu árum og hann er ennþá úti í samfélaginu og fullfær um að gera þetta aftur.“