Fréttaljósmyndir ársins 2015

sunna karen sigurþórsdóttir skrifar 31. desember 2015 16:45

Ljósmyndarar Fréttablaðsins og Vísis eru sjaldan langt undan þegar fréttaviðburðir eiga sér stað. Oft ná þeir að fanga augnablikið betur en orð fréttaskrifara fá lýst og er það ástæða þess að þeir eru alltaf á ferð og flugi, alla daga ársins. Hér má sjá brot af þeim myndum sem ljósmyndararnir tóku á árinu sem senn er á enda.

Deildarmyrkvinn var sá mesti frá árinu 2015.vísir/vilhelm

Sólmyrkvagleraugun umtöluðu

Gleðin skein svo sannarlega úr augum barnanna, sem fengu frá sólmyrkvagleraugu að gjöf frá Stjörnuskoðunarfélagi Seltjarnarness, til þess að berja þennan stórmerka atburð augum. Þrátt fyrir að gleraugun hafi verið ætluð börnunum, þá var þeim gert að skila þeim að notkun lokinni, þar sem reglur Reykjavíkurborgar og annarra sveitarfélaga á um að ekki megi afhenda börnum gjafir á skólatíma. Þrátt fyrir að hinir eldri hafi orðið nokkuð ósáttir við þessar reglur, létu börnin það lítið á sig fá. Deildarmyrkvinn var sá dimmasti á Íslandi frá árinu 1954.

Telati-fjölskyldan

Þessi mynd birtist af Telati-fjölskyldunni, hælisleitendum frá Albaníu, í Fréttablaðinu eftir að hún fékk synjun um hæli hér á landi. Fjölskyldan komst í fréttirnar því börnin þrjú fengu ekki skólavist hér þrátt fyrir ítrekaðar beiðnir frá lögmanni þeirra. Daginn sem fréttin birtist höfðu skólastjórnendur samband við fjölskylduna og börnin fengu öll inni í skóla. Ótrúleg samstaða ríkti á Íslandi og rituðu um átta þúsund manns nafn sitt á undirskriftalista og kröfðust þess að þau fengju hæli á Íslandi.

Bjarni Snæbjörnsson og Frímann Sigurðsson prýddu forsíðu fréttablaðsins í tilefni Hinsegin daga.

Hinsegin dögum fagnað

Bjarni Snæbjörnsson og Frímann Sigurðsson prýddu forsíðu Fréttablaðsins, þar sem þeir sátu saman á regnbogalitum á Skólavörðustíg. Myndin var tekin í tilefni Hinsegin daga, sem náðu hámarki með Gleðigöngunni 8.ágúst, daginn sem myndin birtist. Myndin fékk mikla athygli á samfélagsmiðlum og vakti boðskapurinn mikla lukku, en yfirskrift myndarinnar var „Ástin er alls konar“.

Almari hefur eflaust létt þegar hann fékk loks að stíga út úr glerkassanum sem hann hafði dvalið í í eina viku.

Kallinn í kassanum

Eflaust muna flestir eftir Almari Atlasyni, sem nú er kenndur við kassa. Hann dvaldi í glerkassa í heila viku og fylgdist þjóðin spennt með lífi hans í gegnum netið.

Byltingarárið 2015

Free the nipple, eða frelsum geirvörtuna, var herferð sem var afar fyrirferðarmikil á samfélagsmiðlum. Með frelsun geirvörtunnar vöktu konur athygli á því misrétti sem þær verða. Þær fyrir afklámvæddu þannig brjóst og gengisfelldu hefndarklám, líkt og þær orðuðu það.

Þúsundir lögðu niður störf í ár.vísir/pjetur

Passað upp á að reglum sé fylgt

Verkföll mörkuðu svo sannarlega árið 2015. Þúsundir lögðu niður störf og gætti áhrifa verkfallanna víða. Verkfallsverðir voru fengnir til að gæta þess að öllum reglum yrði fylgt.

Malín Brand að lokinni yfirheyrslu.vísir/vilhelm

Fjárkúgunarsystur

Systurnar Hlín Einarsdóttir og Malín Brand voru handteknar í júní fyrir að hafa reynt að kúga fé út úr Sigmundi Davíð Gunnlaugssyni forsætisráðherra. Hér sést Malín er hún gekk út af lögreglustöðinni, nýkomin úr yfirheyrslu.

Málið vakti gríðarlega athygli en systurnar játuðu báðar aðild að því við yfirheyrslu hjá lögreglu. Rannsókn málsins lauk í nóvember og var það þá sent til ríkissaksóknara sem ákveður hvort ákært verði eða ekki.

Annar maður kærði svo systurnar fyrir fjárkúgun í kjölfar þess að fjárkúgun þeirra á hendur Sigmundi Davíð komst í hámæli. Maðurinn hafði greitt systrunum 700 þúsund krónur gegn því að vera ekki sakaður um að hafa nauðgað Hlín.

Ásta Kristín Andrésdóttir sýknuð af ákæru um manndráp.vísir/stefán

Sýknuð af fordæmalausri ákæru

Það voru fagnaðarfundir þegar Héraðsdómur Reykjavíkur sýknaði Ástu Kristínu Andrésdóttur hjúkrunarfræðing, og Landspítalann, af ákæru um manndráp af gáleysi vegna andláts sjúklings. Málið er fordæmalaust og í fyrsta skipti sem spítalinn eða starfsmaður hans eru ákærðir. Hjúkrunarfræðingar studdu þétt við bakið á Ástu, og fjölmenntu í dómsal þegar dómurinn var kveðinn upp.

Fleiri myndir eru að finna í albúminu hér fyrir neðan.

Umsátursástand ríkti í hátt í sex klukkustundir í Hlíðarhjalla í Kópavogi þegar grunur lék á að maður vopnaður byssu væri inni í blokkinni. Íbúum var gert að fara út af heimilum sínum og var gríðarlegur viðbúnaður umhverfis húsið. Betur fór þó en á horfðist því enginn reyndist inni í íbúðinni.vísir/vilhelm

Einn lést þegar eins hreyfils sjóflugvél með tvo um borð fórst í Barkárdal á Tröllaskaga í ágúst. Viðamikil leit stóð yfir að vélinni í nokkrar klukkustundir og tóku yfir tvö hundruð björgunarsveitarmenn þátt í leitinni, auk þyrlu Landhelgisgæslunnar. Sá sem lést hét Arthur Grant Wagstaff og var kanadískur ríkisborgari. Sá sem komst lífs af heitir Arngrímur Jóhannsson og er þaulreyndur flugmaður.vísir/völundur jónsson

Tveir drengir voru hætt komnir þegar þeir festust í affallinu í Reykdalsstíflu í Hafnarfirði í apríl. Annar drengurinn hafði farið í lækinn á eftir bolta sem þar datt út í og bróðir hans fór á eftir honum.vísir/ernir

Þrátt fyrir að múgur og margmenni væri á Þingvöllum sá þessi ferðamaður ekki aðra lausn en að létta á sér við bílastæðið neðan við Almannagjá. Á Hakinu til hægri á myndinni virtu aðrir fyrir sér útsýnið.vísir/pjetur

Nígerískur karlmaður á þrítugsaldri var handtekinn vegna gruns um að hafa smitað stúlkur af HIV-veirunni. Hann hélt því fram að hann hefði ekki vitað af því að hann væri smitaður.vísir/pjetur

Baltasar Kormákur vakti mikla athygli á árinu.vísir/valli

Halldór Ásgrímsson, fyrrverandi forsætisráðherra, borinn til grafar.vísir/gva

David Cameron kom til Íslands í október til að sitja málþingið Northern Future Forum. Eitthvað virðist hann þó seinn á ferðinni, því á þessari mynd er einungis Sigmund Davíð Gunnlaugsson að finna.vísir/stefán

Þingmenn komu saman í tilefni jóla og gerðu sér glaðan dag. Erfiðu málin og leiðindin lögð á hilluna um stund.vísir/anton brink

Bjarni Benediktsson var endurkjörinn formaður Sjálfstæðisflokksins í október. Ólöf Nordal var kjörin varaformaður og Áslaug Arna Sigurbjörnsdóttir ritari.vísir/valli

Björt Ólafsdóttir, þingmaður Bjartrar framtíðar, ræddi hvítflibbaglæpamenn á Kvíabryggju í Fréttablaðinu. Hún átti nýverið tvíburavísir/stefán

Íslenska karlalandsliðið stóð sig heldur betur vel í ár, við mikinn fögnuð þjóðarinnar.vísir/vilhelm

Þær voru nokkrar lægðirnar sem gengu yfir landið í ár.vísir/vilhelm

Lögreglumenn gengu fylktu liði að stjórnarráðinu og kröfðust betri kjarasamninga. Erfiðlega gekk að ná samningum og kom í kjölfarið upp óvenjuleg staða hjá lögreglunni, þegar flestir lögreglumenn boðuðu forföll.vísir/pjetur

Stærsta Skaftárhlaup sögunnar.vísir/vilhelm

Sanddæluskipið Perla sökk í Reykjavíkurhöfn.vísir/pjetur

Fréttir ársins 2015 Hinsegin

Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Mest lesið

Fleiri fréttir