Hrein skuld ríkissjóðs verði engin innan áratugar

Skuldir ríkisins lækkuðu myndarlega á árinu og var skuldahlutfallið komið niður í 63 prósent af landsframleiðslu í nóvember. Á næsta ári stendur til að greiða niður skuldir ríkisins um 316 milljarða króna og fjármála- og efnahagsráðherra segir stefnt að því að hrein skuld ríkissjóðs verði komin niður í núll innan tíu ára.

Eins og sést á þessum tölum (sjá grafík í myndskeiði) hefur skuldastaða ríkissjóðs haldist svipuð á undanförnum árum en vegna aukins hagvaxtar hefur hlutfall skulda af landsframleiðslu farið lækkandi. Á þessu ári lækkuðu skuldirnar myndarlega og heildarskuldir ríkissjóðs námu 1390 milljörðum króna í nóvember síðastliðnum eða 63,2 prósent af vergri landsframleiðslu Íslands.

Það þykir bara nokkuð viðunandi en þess má geta að hjá skuldsettasta ríki álfunnar, Grikklandi, er þetta hlutfall tæplega 180 prósent. Þessar skuldir íslenska ríkisins munu svo lækka enn frekar á næsta ári.

Í greinargerð fjárlagafrumvarps næsta árs kemur fram að stefnt sé að niðurgreislu skulda um 316 milljarða króna á árinu, einkum vegna stöðugleikaframlaga slitabúa föllnu bankanna. Þegar talað er um hreina skuld ríkisins þá er verið að vísa í skuldir að frádregnum eignum. Bjarni Benediktsson fjármála- og efnahagsráðherra hefur áður lýst markmiði um að koma hreinni skuld ríkisins niður í núll innan tíu ára. Hann áréttaði þetta markmið undir lok þriðju umræðu um fjárlagafrumvarpið á Alþingi.

„Mín skoðun er sú og ég mun tala fyrir því áfram að Íslendingar eigi möguleika á því innan tíu ára að verða með engar hreinar skuldir, engar. Það eru ríki innan OECD á þeim slóðum. Það er einfaldlega þannig að ef við nýtum þetta tækifæri og höldum okkar striki þá getum við komist í þessa stöðu, engar hreinar skuldir. Ef við verðum með viðvarandi viðskiptajöfnuð mun okkur ganga allt í haginn svo lengi sem vinnumarkaðurinn styður við þá ábyrgu fjármálastjórn,“ sagði Bjarni.