Skýring komin á hvarfi kínverska auðjöfursins

Kínverski auðkýfingurinn Guo Guanchang var handtekinn á fimmtudaginn. Talið er að handtakan tengist rannsókn stjórnvalda á spillingu. Guo er 48 ára gamall, eigandi stórfyrirtækisins Fosun og einn af ríkustu einstaklingum Kína. Eignir hans eru metnar á ríflega 700 milljarða króna.

Í fyrstu var ekkert vitað hvað varð um Guo. Samstarfsmenn hans vissu ekkert hvernig þeir ættu að ná sambandi við hann. Meira en sólarhring síðar bárust fréttir af því að hann hefði verið  handtekinn á flugvellinum í Sjanghaí, en engar skýringar fengust þó á handtökunni.

Kínversk stjórnvöld hafa undanfarin misseri verið í herferð gegn spillingu í landinu. Ekki var vitað hvort Guo sé grunaður um misferli sjálfur eða hvort lögreglan hafi viljað ræða við hann sem vitni.

Hlutabréfamarkaðir í Kína tóku einhverjar dýfur í kjölfar frétta af handtökunni. Viðskipti með hlutabréf í Fosun voru stöðvuð þangað til eftir helgi. Á mánudaginn stendur til að halda ársfund fyrirtækisins og reiknað var með að Guo myndi flytja þar ræðu, eins og hann gerir árlega.

Fjöldi kínverskra embættismanna hefur verið handtekinn á síðustu árum í tengslum við spillingarrannsóknir, eða frá því að Xi Jinping tók við forsetaembætti árið 2012 og hét því að útrýma spillingu í landinu.

Flestir hinna handteknu hafa þó verið háttsettir félagar í kínverska Kommúnistaflokknum.

BBC skýrir síðan frá því að undanfarnar vikur hafi auðugir Kínverjar horfið hver á fætur öðrum. Fyrir þremur vikum hvarf til dæmis Yim Fung, forstjóri verðbréfafyrirtækisins Guotai Securities. Fyrr í þessari viku hafi síðan tveir bankamenn í fyrirtækinu Citic Securities horfið skyndilega.

Guo hefur verið kallaður kínverska útgáfan af bandaríska fjárfestinum Warren Buffet.

Þegar Guo stofnaði fyrirtæki sitt árið 1992, ásamt nokkrum öðrum ungum mönnum, var hann ný­útskrifaður úr skóla. Nú er Fuson eitt af stærri fjárfestingarfyrirtækjum heims. Meðal eigna þess má nefna umfangsmikil lyfjafyrirtæki, tryggingafyrirtæki, ferðaþjónustufyrirtæki og fleira. Þar á meðal er sirkusinn þekkti, Cirque du Soleil, í eigu Fosun.