Jólasveinar léku á als oddi á Selfossi

Fjölmenni mætti í miðbæ Selfoss í dag til að taka á móti jólasveinunum úr Ingólfsfjalli. Þeir komu til að kveikja á jólatrénu og heilsa upp á unga sem aldna.

Þeir komu á jólasveinarútunni svokölluðu yfir Ölfusárbrú og blessunarlega fyrir sveinana voru engir lögreglumenn í augsýn. Enginn var í beltum og flestir meira að segja utan á vagninum.

„Við erum að hitta krakkana og reyna að kveikja á þessu drasli þarna,“ sagði Hurðaskellir Leppalúðason við bróður sinn Skyrgám í kvöldfréttum Stöðvar 2.

Skilaboð hans til íslenskra barna voru skýr. „Bara vera þæg og borða mikinn grjónagraut.“

Viðtalið og svipmyndir frá Selfossi má sjá í spilaranum hér að ofan.