Þörf fyrir aðstoð eykst
Eftirspurn eftir aðstoð hjá Hjálparstarfi kirkjunnar hefur aukist nú fyrir jólin. Þegar hafa 300 manns fengið aðstoð og Anna Ólafsdóttir, upplýsingafulltrúi Hjálparstarfs kirkjunnar, býst við að annar eins fjöldi óski eftir aðstoð á fimmtudag og föstudag en þá eru formlegir úthlutunardagar. Um jólin býst hún við að um 900 manns hafi fengið aðstoð. "Mjög margir eru að biðja um aðstoð í fyrsta skipti, sérstaklega eru margir nýir utan Reykjavíkur. Við finnum fyrir mikilli fjölgun hjá langtímaatvinnulausum úti á landsbyggðinni, til dæmis á Suðurnesjum," segir Vilborg. Aðstoð Hjálparstarfsins er fólgin í matargjöfum að verðmæti 7-10 þúsund króna eftir fjölskyldustærð. Þeir sem óska eftir aðstoð hafa samband við sinn sóknarprest sem sendir inn beiðni um aðstoð. Aðstoðin felst í hversdagsmat í von um að fólk geti sparað sér þau innkaup og keypt í staðinn í jólamatinn. Að auki hefur Jóhannes í Bónus gefið 10 milljónir króna í Bónuskortum og ráðstafar Hjálparstarf kirkjunnar þessum kortum nema þegar um mæður í Reykjavík er að ræða. Mæðrastyrksnefnd afhendir þeim kortin.
Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.
