Innlent

Sagðist ætla að greina frá nauðgun ef myndbandsupptaka birtist

Kolbeinn Tumi Daðason skrifar
Piltarnir voru úrskurðaðir í gæsluvarðhald daginn eftir að þeir voru kærðir fyrir nauðgun. Framburður þeirra var efnislega á sama veg í gegnum allar skýrslutökur.
Piltarnir voru úrskurðaðir í gæsluvarðhald daginn eftir að þeir voru kærðir fyrir nauðgun. Framburður þeirra var efnislega á sama veg í gegnum allar skýrslutökur. Vísir/Vilhelm
Framburður piltanna fimm sem sýknaðir voru í morgun af ákæru um nauðgun í samkvæmi í Breiðholti í maí í fyrra var efnislega á sama veg. Dómurinn komst að þeirri niðurstöðu að ekkert hefði komið fram í málinu sem gefur til kynna að stúlkan hafi ekki verið samþykkt því sem fram fór í íbúðinni. Piltarnir eru á aldrinum 18-21 árs en stúlkan varð átján ára í sumar. Einn piltanna, sá elsti, hlaut þrjátíu daga skilorðsbundinn dóm fyrir að hafa tekið upp hluta þess sem fram fór í svefnherberginu.

Í niðurstöðu dómsins segir að hinir ákærðu hafi hver um sig lýst málinu efnislega á sama veg frá upphafi, allt frá því að þeir voru í einangrun og gæsluvarðhaldi í kjölfar þess að hafa verið handteknir. Dómurinn segir hins vegar að vitnisburður stúlkunnar hafi verið breytilegur um sumt og að hún hafi munað sumt illa.

Mótmæltu upptöku myndbands

Þá nefnir dómurinn sérstaklega að svo virðist sem hún hafi fyrst greint frá nauðgun eftir að ljóst var að hluti atburðanna hafi verið teknir upp á myndband. Stúlkan og nokkrir piltanna munu samkvæmt vitnisburði hafa  verið ósátt við upptöku myndbands og mótmælt. Dæmdi hafi sagst ekki vera að taka upp myndband heldur aðeins að nota ljósið á síma sínum til að lýsa upp herbergið. Fullyrti hann að enginn hefði mótmælt upptökunni, aðeins ljósinu. 

Í vitnaleiðslum fyrir dómi  kemur einnig fram að stúlkan hafi sagt við vinkonur sínar að hún ætlaði að segja atburðinn hafa verið nauðgun færi fyrrnefnd myndbandsupptaka í dreifingu.

Dómurinn vísar einnig til þess sem sást í myndbandsupptöku úr eftirlitsmyndavél í húsinu þar sem atburðirnir áttu sér stað. Á upptökunni sést hún tala í síma og sækja þýfi sem komið hafði verið fyrir undir stiga í húsinu. Dómurinn segir að af þessari upptöku verði ekki ráðið að hún hafi skömmu fyrr orðið fyrir því alvarlega broti sem lýst var í ákærunni.

Einn dómarinn skilaði sératkvæði

Sem fyrr segir hlaut elsti pilturinn þrjátíu daga skilorðsbundinn dóm auk þess sem hann þarf að greiða stúlkunni hálfa milljón króna í bætur fyrir að taka upp án hennar samþykkis. Hann var hins vegar sýknaður af því að hafa sýnt samnemendum í Fjölbrautaskólanum í Breiðholti myndbandi.

Einn dómari í málinu, Arngrímur Ísberg, skilaði sératkvæði í þessum ákærulið en hann taldi komna fram lögfulla sönnun þess að ákærði hefði sýnt myndbandið. Um alvarlegt brort væri að ræða og mikla meingerð af hálfu ákærða gagnvart stúlkunni og ætti refsing hans því að vera þyngri og miskabætur hærri.

Dóminn í heild sinni má lesa hér.


Tengdar fréttir

Allir sýknaðir af hópnauðgun

Fimm piltar á aldrinum 18-21 árs hafa verið sýknaðir af ákæru um nauðgun á sextán ára stúlku í samkvæmi í Breiðholti í maí í fyrra. Einn var sakfelldur fyrir að taka atvikið upp.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.