Umfjöllun og viðtöl: Þór Þ. - Tindastóll 92-66 | Stólarnir steinlágu - Davíð Arnar með sjö þrista

Þór. Þ. vann frábæran sigur, 92-66, á Tindastól í Dominos-deild karla í  körfubolta í kvöld en leikurinn fór fram í Þorlákshöfn. Davíð Arnar Ágústsson, leikmaður Þórs. Þ., gerði sér lítið fyrir og setti niður sjö þrista í kvöld og það úr átta tilraunum.

Bæði lið voru ákveðin í upphafi leiksins og Þórsarar ætluðu sér greinilega ekki að tapa þriðja leiknum í röð. Heimamenn frá Þorlákshöfn sýndu fínan varnarleik og þurftu Stólarnir að hafa fyrir hverju stigi. Tindastólsmenn áttu aftur á móti svör við varnarleik Þórs og var því mikið jafnræði á með liðinum í fyrsta leikhluta. Staðan var 26-24 fyrir Tindastól eftir tíu mínútna leik.

Í öðrum leikhluta byrjuðu Þórsarar virkilega vel og voru þeir feikisterkir sóknarlega. Liðið lét boltann ganga ótrúlega vel og opnuðu með því fyrir skytturnar í liðinu. Davíð Arnar Ágústsson gerði til að mynda þrjár þriggja stig körfur í fyrri hálfleiknum. Vance Michael Hall stjórnaði leik liðsins vel og skoraði hann einnig nokkrar flottar körfur. Stólarnir voru í vandræðum sóknarlega og var skotnýting leikmanna liðsins ekki góð í fyrri hálfleik. Darrel Lewis kom reyndar sterkur inn undir lok hálfleiksins og gerði til að mynda tvær þriggja stiga körfur í röð og kom liðinu aftur inn í leikinn en staðan í hálfleik var 46-40.

Heimamenn byrjuðu frábærlega í síðari hálfleiknum og komust fljótlega fimmtán stigum yfir 56-41 og Stólarnir náðu einfaldlega ekki að koma boltanum ofan í. Enn voru Þórsarar að opna fyrir skytturnar sínar. Lítið sem ekkert gekk upp hjá Tindastólsmönnum í leikhlutanum og Þórsarar nýttu sér það til hins ýtrasta. Staðan fyrir lokaleikhlutann var 69-54.

Stólarnir náðu ekki að bæta sinn leik í loka leikhlutanum og Þórsarar léku á alls oddi. Þá sérstaklega Davíð Arnar Ágústsson sem hafði sett niður sex þrista úr sex tilraunum þegar sjö mínútur voru eftir af leiknum, hreint ótrúlegt. Þórsara héldu fínni stöðu út leikinn og unnu ótrúlega öruggan sigur, 92-66.

Sigurinn skrifast á frábæran varnarleik þar sem Ragnar Nathanaelsson fór fyrir sínum mönnum undir körfunni og ótrúlega skynsamlegum sóknarleik þar sem Davíð Arnar fór einfaldlega á kostum. Hans besti leikur á ferlinum, það hlýtur bara að vera. Hann endaði með 21 stig og bara úr þriggja stiga skotum. Þórsarar voru mest 30 stigum yfir í leiknum og það segir sína sögu.

Einar Árni: Besti varnarleikur sem við höfum sýnt

„Þetta var sennilega besti varnarleikur sem við höfum spilað, svona heilt yfir,“ segir Einar Árni Jóhannsson, þjálfari Þórs, eftir leikinn.

„Við vorum reyndar í vandræðum í fyrsta leikhluta og þeir skoruðu 26 stig. En eftir það spiluðum við frábæra liðsvörn. Svo kemur bara ósjálfrátt ákveðin stemning með í sóknina þegar við náum að stoppa þá svona vel. Ég er gríðarlega ánægður með mitt lið í kvöld.“

Einar segir að tapleikurinn á móti Keflvíkingum hafi ennþá setið í mönnum í kvöld og liðið hafa því verið vel tilbúið fyrir leikinn.

„Við erum að verða bara betri og betri í því að fara með boltann inn á Ragga og hann er að verða betri í því að velja hvort hann eigi að fara sjálfur eða finna aðra. Hans sending út býr til rosalega mikið fyrir okkur.“

Einar segir að fyrir vikið hafi skyttur liðsins blómstrað í kvöld og þá sérstaklega Davíð Arnar.

„Maður verður einnig að taka það með í reikninginn að hann hefur lítið spilað í úrvalsdeild, hann er aðeins 19 ára. Hann er búinn að vera þolinmóður og vinnusamur og veit að hann mun fá tækifæri núna þar sem Grétar [Ingi Erlendsson] er að fara í aðgerð á mánudaginn og verður frá fram í janúar.“

Piokola: Við vorum skelfilegir

„Þetta var skelfilegur leikur að okkur hálfu, en maður verður bara að óska Þórsurum til hamingju með sigurinn,“ segir Pieti Piokola, þjálfari Tindastóls, eftir tapið í kvöld.

„Þeir voru bara betri en við í kvöld og sýndu hvar okkar veikleikar eru. Nú vitum við hvar við þurfum að lagfæra,“ segir Piokola. Tindastóll skoraði aðeins fjörutíu stig í 2., 3. og 4. leikhluta.

„Við vorum bara ekki að stöðva þá sóknarlega, við eigum eftir að byrja skora þegar við lögum varnarleikinn okkar. Við fráköstuðum ekkert í kvöld og vorum seinir í allar aðgerðir.“

Piokolan segir að leikmenn liðsins fái frí frá æfingu á morgun og síðan hefjast æfingar og þá verði hlutirnir teknir í gegn. 

Davíð Arnar: Ég lofa átta þristum í næsta leik„Ég var heitur í upphitun og var að finna mig vel á gólfinu,“ segir Davíð Arnar Ágústsson, stjarna kvöldsins, sem setti niður sjö þriggja stig körfur í kvöld og það úr átta skotum.

„Ég fann það bara á mér fyrir leik að ég myndi hitta vel í kvöld. Mér leið ótrúlega vel inni á vellinum og var alltaf hundrað prósent viss um það þegar ég var með boltann að hann væri að fara ofan í.“

Davíð segist ætla nýta fjarveru Grétars vel og ætlar hann að gera sitt besta til að hjálpa liðinu.

„Það opnast mikið fyrir okkur fyrir utan þegar Raggi er undir körfunni. Ég lofa átta þristum í næsta leik, ef ég fæ réttum skotin.“

+

Bein lýsing: Þór Þorlákshöfn - Tindastóll

Tweets by @VisirKarfa2