Tímamót á fundi Norðurlandaráðs í Reykjavík

Söguleg tímamót gætu orðið á þingi Norðurlandaráðs í Reykjavík á morgun þegar ályktun um málefni Palestínu og Ísraels kemur til atkvæða. Forsætisráðherrar Norðurlandanna eru einhuga um að efla samstarf Norðurlandanna og auðvelda borgurum þeirra að flytjast á milli landanna án kerfislegra hindrana.

Tillaga um að Norðurlöndin beiti sér sameiginlega í deilum Ísraels og Palestínumanna lætur ekki mikið yfir sér en hefur nú þegar kallað á viðbrögð Ísraelsmanna. En það er tiltölulega nýtt að Norðurlandaráð fjalli um utanríkismál.

Upprunalega lögðu vinstriflokkarnir í Norðurlandaráði fram tillögu í þessa átt á þingi þess í fyrra. En eftir nokkrar umræður var tillagan sameinuð breytingartillögum frá sósíaldemókrötum og Höskuldi Þórhallssyni fyrir hönd hluta miðflokkanna. Íhaldsflokkarnir vildu hins vegar vísa tillögunni frá.

Steingrímur J. Sigfússon þingmaður Vinstri grænna telur nokkra möguleika á að tillagan verði samþykkt á þinginu á morgun.

„Vegferð þessarar tillögu í gegnum Norðurlandaráð og þessi vinna er áhugaverð. Það er í raun og veru verið að skrifa svolítið nýjan kafla í sögu Norðurlandaráðs með því að taka viðkvæmt utanríkispólitískt deilumál af þessu tagi og vinna með það í stað þess að henda því út eins og ýmsir reyndar vildu,“ segir Steingrímur.

Það yrðu því nokkur tímamót í sögu Norðurlandaráðs verði tillagan samþykkt.

Forsætisráðherrar Norðurlandanna lögðu allir áherslu á mikilvægi norðurlandasamstarfsins og styrkingu þess í fyrirspurnatíma í dag. Mikil áhersla er lögð á að eyða ýmsum kerfislegum hindrunum fyrir því að íbúar landanna flytjist á milli þeirra bæði til náms og vinnu og svo aftur til heimalanda sinna, án þess að réttindi skerðist.

Steingrímur telur ekki hættu á að samskipti Norðurlandanna við Ísrael spillist verði tillagan samþykkt en Ísraelar hafa nú þegar lýst óánægju sinni með t.d. umdeilda samþykkt í borgarstjórn og ályktun á nýliðnum landsfundi Vinstri grænna.

„Ísraelar fylgjast með öllu og bregðast hart við ef þeim finnst eitthvað stugga við sér. En er það nú ekki veruleikinn að það er það sem þarf? Að gera Ísraelsmönnum það ljóst að þeir geta ekki endalaust í krafti hervalds eyðilagt allar tilraunir til að ná þarna friði og byggja á afdráttarlausum samþykktum Sameinuðu þjóðanna,“ segir Steingrímur J. Sigfússon.