Hajj í Mekka: Tala látinna nú komin í 717

Talsmenn sádi-arabískra yfirvalda hafa nú staðfest að 717 pílagrímar hið minnsta séu látnir eftir að hafa troðist undir fyrir utan Mekka. 805 til víðbótar eru slasaðir.

Í frétt BBC segir að fólkið hafi látist í dalnum Mina sem er um fimm kílómetra austur af Mekka.

Hajj, trúarhátíð múslíma í Mekka stendur nú yfir og er búist við að um tvær milljónir pílagríma sæki Mina heim á næstu dögum.

Múslímar þurfa að fara í pílagrímsferð til Mekku, hinnar heilagrar borgar í Sádi-Arabíu og fæðingarborg Múhameðs spámanns, að minnsta kosti einu sinni á ævinni ef fjárhagur og heilsa leyfa.

Í borginni Mina eru þrjár súlur sem pílagrímarnir kasta steinum að til að minnast þess þegar djöfullinn freistaði Ísmaels og Abrahams.

107 manns fórust við undirbúning hajj-hátíðarinnar fyrr í mánuðinum þegar krani féll á fjölda fólks við stóru moskuna í Mekka.

BBC hefur tekið saman lista yfir mannskæðustu slysin í tengslum við hajj-hátíðina síðustu árin:

• 2015: 107 manns fórust þegar byggingakrani féll við stóru moskuna í Mekka
• 2006: 364 pílagrímar láta lífið í troðningi þegar steinum var kastað að súlunum í Mina
• 1997: 343 pílagrímar láta lífið og 1.500 slasast í eldsvoða
• 1994: 270 láta lífið í troðningi
• 1990: 1,426 pílagrímar láta lífið í troðningi í göngum sem liggja að heilögustu stöðunum í Mekka
• 1987: 400 manns farast í aðgerðum sádi-arabískra yfirvalda gegn mótmælendum