Lewis Hamilton vann í Japan

Lewis Hamilton kom fyrstur í mark í japanska kappakstrinum. Liðsfélagi hans, Nico Rosberg varð annar og Sebastian Vettel á Ferrari þriðji.

Hamilton stal forystunni af liðsfélaga sínum strax í ræsingunni. Rosberg tapaði í raun þremur sætum strax í byrjun keppninnar.

„Þeir taka fram úr mér eins og ég sé á GP2 bíl. Þetta er vandræðalegt, mjög vandræðalegt,“ sagði Fernando Alonso í talstöðinni. Tvo hringi í röð missti hann ökumenn fram úr sér á ráskafla brautarinnar.

Daniel Ricciardo og Felipe Massa lentu í samstuði í ræsingunni. Í atvikinu sprungu dekk á báðum bílum. Red Bull átti tvo síðustu bílana í keppninni á tímabili. Red Bull hefur verið á verðlaunapalli í Japan á hverju ári síðan 2006.

Rosberg gat einbeitt sér að því að elta Hamilton eftir annað þjónustuhlé Vettel. Vettel kom út á brautina eftir þjónustuhléið fyrir aftan Rosberg, sem þá var orðinn annar.

Baráttan Finnanna, Valtteri Bottas og Kimi Raikkonen varð að engu þegar Raikkonen nýtti sér þjónustuhlé til að taka fram úr.

Aðeins einn ökumaður, Felipe Nasr á Sauber kláraði ekki keppnina, hann átti tvo hringi eftir þegar hann hætti keppni. Hann fær þó skráð að hann hafi lokið keppni. Þetta er því einungis fimmta keppnin í sögu Formúlu 1 þar sem allir klára.

Fimm fremstu ökumennirnir í dag röðuðust í sömu sæti og þeir eru í, í stigakeppni ökumanna.

Hér fyrir neðan má finna úrslit helgarinnar á gagnvirku brautarkorti.