Rosberg: Bíllinn er eins og lest

Nico Rosberg var hæstánægður með ráspól sinn fyrir Mercedes liðið á Suzuka brautinni í morgun. Óhapp Daniil Kvyat undir lok þriðju lotu hafði mikil áhrif á baráttuna. Hver sagði hvað eftir tímatökuna?

„Við erum búin að vera mjög upptekin. Bíllinn er eins og lest, sem er sjaldgæft hér á Suzuka. Ég var ánægður með bílinn frá fyrstu beygju í tímatökunni. Það er gott að byrja á ráspól á Suzuka. Það er erfitt að komast fram úr í gegnum þjónustuhlé hér. Keppnin á morgun gæti snúist mikið um að halda dekkjunum í skefjum,“ sagði Rosberg.

„Nico átti betri dag. Hringurinn sem ég var byrjaður á var góður en ég veit ekki hvað hefði orðið en rauða flaggið kom áður en ég náði að klára. Ég mun reyna mitt besta á morgun,“ sagði Lewis Hamilton sem ræsir annar á morgun á Mercedes.

„Þetta voru bara byrjendamistök. Það er allt í lagi með mig. Ég vil biðja liðið afsökunar það verður nóg að gera i að endurbyggja bílinn. Ég veit ekki hvaðan ég ræsi á morgun,“ sagði Kvyat sem klessti Red Bull bílinn og batt enda tímatökuna.

„Við áttum nokkra tíundu úr sekúndu inni en hvort það hefði breytt stöðunni er erfitt að segja. Ég er mjög ánaægður með bílinn en sjöunda sæti endurspeglar það ekki,“ sagði Daniel Ricciardo sem ræsir sjöundi á morgun á Red Bull bílnum.

„Gott að vera aftur í formi. Það munaði ekki miklu á okkar mönnum, núna munum við aldrei komast að því hvort Lewis (Hamilton) átti nóg inni til að fara hraðar en Nico (Rosberg) en það er gott að vera aftur fremstir á ráslínu,“ sagði Toto Wolff, liðsstjóri Mercedes.

„Mér tókst ekki að ná takti í dag fyrr en undir lok annarrar lotu. Ég var á góðum hring þegar rauðu flöggin komu,“ sagði Sebastian Vettel sem ræsir fjórði á morgun á Ferrari bílnum.

„Við hefðum átt að geta náð þriðja sæti í dag. Dekkin voru ekki nógu góð í dag. Ég hafði góða tilfinningu fyrir hringnum sem ég var á þegar rauða flaggið kom,“ sagði Kimi Raikkonen sem ræsir sjötti á morgun á Ferrari bílnum.

Hér fyrir neðan má finna öll helstu úrslit helgarinnar á gagnvirku brautarkorti.