Fjárheimildir skornar niður um 32 milljónir króna milli ára

Gert er ráð fyrir að fjárheimildir til ríkissaksóknara lækki um 31,8 milljón króna að raungildi í fjárlagafrumvarpi næsta árs.

Lögð er til 50 milljóna króna lækkun vegna verkefna sem færast frá ríkissaksóknara til nýs embættis héraðssaksóknara með breyttri skipan ákæruvalds.

Í öðru lagi er gert ráð fyrir 20 milljóna króna framlagi sem lýtur að eflingu embættisins með tveimur nýjum stöðugildum, meðal annars vegna eftirlits með rannsóknum og meðferð ákæruvalds, eftirlits með hlustunum og sérstökum rannsóknaraðferðum, vinnslu tölfræðiupplýsinga ákæruvaldsins, menntunar og þjálfunar ákærenda og alþjóðlegra samskipta.

Sigríður Friðjónsdóttir ríkissaksóknari segir að önnur af tveimur meginforsendum með stofnun embættis héraðssaksóknara hafi verið að efla embætti ríkissaksóknara.

„Ríkisendurskoðun var búin að skoða málin hjá okkur og komst að þeirri niðurstöðu í skýrslunni að það væri varhugavert að skera niður,“ segir Sigríður.

Í umræddri skýrslu gagnrýnir Ríkisendurskoðun að á árunum 2009 til 2015 hafi sérstakur saksóknari fengið fimmfalt hærri upphæð af fárlögum en ríkissaksóknari , eða 5,5 milljarða á móti 1,1 milljarði. Nánast öll sakamál í landinu séu á könnu ríkissaksóknara, auk þess sem embættið gegni umfangsmiklu eftirlits- og samræmingarhlutverki.

Sigríður Friðjónsdóttir segir að með tilkomu héraðssaksóknaraembættisins muni stór hluti af verkefnum frá ríkissaksóknara fara til nýja embættisins. Á móti komi að mörg ný verkefni bætist við. Til dæmis í formi kærumála sem verða mörg hundruð. Hún býst til dæmis við því að stór hluti þeirra kynferðisbrotamála sem héraðssaksóknari kemur til með að fella niður verði kærður til ríkissaksóknara. „Það er mjög mikil vinna í þeim málum.“

Þá bendir Sigríður á að gert sé ráð fyrir því í fjárlögunum að 20 milljóna framlag verði nýtt til þess að ráða í tvö ný stöðugildi. „En málið er það að tveir starfsmenn kosta 26 milljónir,“ segir hún og vonast til að þarna hafi bara orðið reiknivilla sem verði leiðrétt á meðan fjárlagafrumvarpið er í meðförum þingsins.