Tollverðir og lögregla lögðu hald á 90 kíló af hörðum efnum á Seyðisfirði í gær. Efnin fundust í bíl sem kom hingað til lands með Norrænu en samkvæmt heimildum Vísis uppgötvuðust efnin ekki fyrr en bíllinn var kominn í land.

Vísir sagði frá því fyrr í dag að fleiri en einn hefðu verið handteknir vegna málsins sem er til rannsóknar hjá lögreglunni á Austurlandi. Fréttastofa RÚV hefur heimildir fyrir því að lögreglan hefði handtekið erlent par vegna málsins.

Þessi fíkniefnafundur er einn sá stærsti á Íslandi en árið 2009 lögðu tollverðir hald á tugi kílóa af amfetamíni, bæði í duft og vökvaformi, í Papaeyjarmálinu svokallaða.