Engin uppgjöf á Djúpavogi og fiskvinnslan endurreist

Tekist hefur að endurheimta tvo þriðju hluta þeirra fiskvinnslustarfa sem töpuðust á Djúpavogi þegar Vísir í Grindavík ákvað að loka í fyrra. Samstöðu heimamanna er þakkað.

Tilkynningin í fyrravor þótti reiðarslag fyrir Djúpavog enda var fiskvinnsla Vísis stærsta atvinnufyrirtækið. Skilaboðin til starfsmanna þóttu stuðandi; þið getið bara flutt öll til Grindavíkur. Á Djúpavogi neituðu menn hins vegar að gefast upp.

Í fréttum Stöðvar 2 sést línubáturinn Sunnutindur SU, áður Þórkatla GK, koma inn með afla til vinnslu í heimabyggð en fyrirtækið Búlandstindur keypti hann til Djúpavogs í vor til að styðja við fiskvinnsluna. Elís Grétarsson, framkvæmdastjóri Búlandstinds ehf., segir að samið hafi verið við Vísi um að fá húsin. Tæki og tól hafi verið keypt til að halda áfram vinnslunni.

Fimm bátar landa nú reglulega hjá Búlandstindi. Fyrirtækið er í eigu Ósness á Djúpavogi og Fiskeldis Austfjarða en það vinnur einnig eldisfisk. Elís segir að áður hafi starfað yfir 50 manns hjá Vísi og nú séu starfsmenn orðnir um 35 talsins. 

„Það hefur tekist ótrúlega vel að vinna úr þessu og það sýnir hvað samfélagið er í raun sterkt í grunninn,“ segir Andrés Skúlason, oddviti Djúpavogshrepps.

Hér er byggðakvóti lykilþáttur, að sögn Elíss. „Það vantar svolítið mikið upp á aflaheimildirnar. Það þyrfti að vera minnst helmingi meira, þannig að vel ætti að vera,“ segir Elís.

Andrés oddviti bendir á að 50 manns hafi flutt burt á einu bretti. Við svipaðar aðstæður hafi það gerst í mörgum öðrum samfélögum að húsin, sem fólkið flutti úr, hafi selst sem sumarhús.

„En hér gerðist það ekki. Hér hafa húsin selst, ungt fjölskyldufólk, kraftmikið, verið að kaupa þessi hús. Þannig að þetta sýnir fyrst og síðast hvað íbúarnir hafa mikla trú á byggðinni sinni. Þannig að hér er sko engin uppgjöf,“ segir Andrés. 

Djúpivogur er því ekki deyjandi samfélag: „Nei, nei. Djúpivogur verður hérna áfram, hef ég trú á,“ segir framkvæmdastjóri Búlandstinds.